शिर्डी – महाराष्ट्र संवाद न्यूज ऑनलाईन वृत्त
शिर्डी येथे येत्या १२ ते १६ ऑक्टोबर २०२५ दरम्यान परमपूज्य प्रदीपजी मिश्रा महाराजांच्या मार्गदर्शनाखाली भव्य शिवपुराण कथा महोत्सवाचे आयोजन करण्यात आले आहे. माजी खासदार डॉ. सुजय विखे पाटील यांनी स्वतः मध्यप्रदेशातील सिहोर जिल्ह्यातील कुबेरेश्वर धाम येथे जाऊन महाराजांची भेट घेतली आणि त्यांना शिर्डीतील या अध्यात्मिक सोहळ्यासाठी आमंत्रित केले.
या शिवकथा महोत्सवाच्या संपूर्ण आयोजनाची जबाबदारी विखे पाटील कुटुंबियांनी स्वीकारली आहे. गेल्या अनेक महिन्यांपासून शिर्डी आणि अहिल्यानगर परिसरातील माता-भगिनींकडून शिवकथेसारखा अध्यात्मिक सोहळा आयोजित करण्याची सातत्याने विनंती केली जात होती. या भक्तीभावाला प्रतिसाद देत डॉ. सुजय विखे पाटील यांनी हा कार्यक्रम आयोजित करण्याचा पुढाकार घेतला आहे. या महोत्सवाला ५ लाखांहून अधिक भाविक उपस्थित राहतील अशी अपेक्षा आहे.
डॉ. सुजय विखे पाटील यांनी याप्रसंगी आवाहन केले आहे की, शिवकथा केवळ श्रवणाचा सोहळा नसून, आत्मशुद्धी आणि जीवनाला योग्य दिशा देणारा एक प्रकाशस्तंभ आहे. त्यामुळे सर्वांनी या पावन महोत्सवात सहभागी होऊन या अध्यात्मिक सोहळ्याचा लाभ घ्यावा.
Post Views: 1,018
