महाराष्ट्र संवाद न्यूज ऑनलाईन वृत्त – अहिल्यानगर:
महाराष्ट्रातील प्रसिद्ध शनिशिंगणापूर देवस्थान पुन्हा एकदा मोठ्या वादंगात सापडले आहे. नुकत्याच झालेल्या विधिमंडळ अधिवेशनात देवस्थान ट्रस्टमध्ये मोठ्या आर्थिक घोटाळ्यांचा पर्दाफाश झाल्यानंतर राज्यभरात याचे तीव्र पडसाद उमटले होते. आता या प्रकरणात आणखी एक धक्कादायक वळण आले असून, देवस्थानचे माजी विश्वस्त आणि सध्याचे उपकार्यकारी आधिकारी नितीन शेटे यांनी सोमवारी संशयास्पद परिस्थितीत राहत्या घरी छताला गळफास घेऊन आत्महत्या केल्याने मोठी खळबळ उडाली आहे.
त्यांच्या मृत्यूमागील नेमके कारण अद्याप स्पष्ट झालेले नसले, तरी शनिशिंगणापूर आणि अहमदनगर जिल्ह्याभरात “देवस्थानातील भ्रष्टाचार, आर्थिक गैरव्यवहार आणि चौकशीच्या भीतीमुळेच त्यांनी हे टोकाचे पाऊल उचलले का?” अशा चर्चांना उधाण आले आहे. गावातील अनेक नागरिकांनी थेट आरोप करत म्हटले आहे की, देवस्थान व्यवस्थापनात गेल्या काही वर्षांपासून अनेक आर्थिक अनियमितता आणि निर्णय प्रक्रियेत अपारदर्शकता सुरू आहे. काही स्थानिकांनी तर नितीन शेटे यांच्याकडे देवस्थानातील काही बड्या व्यक्तींना उघडं पाडू शकणाऱ्या अनेक गोपनीय फाईल्स आणि महत्त्वाची माहिती होती, असा दावा केला आहे. त्यामुळे ही आत्महत्या नसून एक संशयास्पद मृत्यू असल्याची मागणी नागरिकांकडून जोर धरू लागली आहे. या घटनेमुळे स्थानिकांमध्ये प्रचंड संताप आणि अविश्वासाचे वातावरण निर्माण झाले आहे.
नितीन शेटे यांनी आत्महत्या का केली, याचा अधिकृत तपशील अद्याप जाहीर झालेला नाही. पोलिसांकडून तपास सुरू असल्याचे सांगण्यात येत असले, तरी या घटनेमागे कोणाचा दबाव, धमक्या किंवा एखादे मोठे षडयंत्र आहे का, हे तपासाअंतीच स्पष्ट होईल.
राज्याला हादरवणाऱ्या या घटनेचा सखोल आणि निष्पक्ष तपास होण्याची मागणी आता जोर धरत आहे. यातूनच सत्य बाहेर येईल आणि दोषींवर कारवाई होईल, अशी अपेक्षा व्यक्त केली जात आहे.
Views: 1,779
