महाराष्ट्र संवाद न्यूज ऑनलाईन वृत्त, अहिल्यानगर:
अहिल्यानगर तालुका पोलिसांनी बनावट नोटा तयार करणाऱ्या एका मोठ्या रॅकेटचा पर्दाफाश केला आहे. या कारवाईत पोलिसांनी तब्बल ८८ लाख २० हजार ६०० रुपये किमतीचा मुद्देमाल जप्त केला असून, यामध्ये बनावट नोटा, त्यांना तयार करण्यासाठी वापरली जाणारी मशिनरी आणि एक वाहन यांचा समावेश आहे. या प्रकरणी अहिल्यानगर, बीड आणि छत्रपती संभाजीनगर जिल्ह्यातील सात आरोपींना अटक करण्यात आली आहे.
नगर तालुका पोलिस ठाण्याचे सहायक पोलिस निरीक्षक प्रल्हाद गीते आपल्या पथकासह हद्दीत गस्त घालत असताना, त्यांना आंबिलवाडी शिवारात दोन संशयित व्यक्ती काळ्या रंगाच्या महिंद्रा थार गाडीतून फिरत असून, ते पान टपरीवर ५०० रुपयांच्या बनावट नोटा देऊन सिगारेट खरेदी करत असल्याची माहिती मिळाली होती. या माहितीच्या आधारे पोलिसांनी सापळा रचून निखिल शिवाजी गांगर्डे (वय २७, रा. कुंभळी, ता. कर्जत) आणि सोमनाथ माणिक शिंदे (वय २५, रा. तपोवन रोड) या दोघांना ताब्यात घेतले. त्यांच्या गाडीची झडती घेतली असता, ८०,००० रुपयांच्या ५०० रुपयांच्या बनावट नोटा पोलिसांना मिळाल्या.
ताब्यात घेतलेल्या आरोपींच्या चौकशीतून पोलिसांनी या टोळीतील इतर सदस्यांचा शोध घेतला. यात बीड जिल्ह्यातील प्रदीप संजय कापरे (वय २८, रा. तिंतरवणी, ता. शिरुर कासार) तसेच छत्रपती संभाजीनगर येथील मंगेश पंढरी शिरसाठ (वय ४०), विनोद दामोधर अरबट (वय ५३), आकाश प्रकाश बनसोडे (वय २७), आणि अनिल सुधाकर पवार (वय ३४) या पाच आरोपींना अटक करण्यात आली आहे. तर अंबादास रामभाऊ ससाणे (रा. शहर टाकळी, ता. शेवगाव) हा आरोपी फरार असून, पोलिस त्याचा शोध घेत आहेत.
या कारवाईत पोलिसांनी ५९ लाख ५० हजार रुपयांच्या तयार बनावट नोटा, बनावट नोटा तयार करण्याचे कागद व शाई, तसेच २७ लाख ९० हजार ६०० रुपयांची मशिनरी व इतर साहित्य असा एकूण ८८ लाख २० हजार ६०० रुपयांचा मुद्देमाल जप्त केला आहे.
या प्रकरणी पान टपरी चालकाच्या सतर्कतेमुळेच हे मोठे रॅकेट उघडकीस आले. त्याने दाखवलेल्या सजगतेमुळे पोलिस अधीक्षक सोमनाथ घार्गे यांनी पत्रकार परिषदेत त्याचे कौतुक केले आणि त्याचा सत्कार करणार असल्याचे सांगितले. या कारवाईत सहाय्यक पोलिस निरीक्षक प्रल्हाद गीते यांच्यासह भरत धुमाळ, सुभाष थोरात, रविकिरण सोनटक्के, बाबासाहेब खेडकर, मंगेश खरमाळे, शरद वांदेकर, खंडू शिंदे, सागर मिसाळ, राजू खेडकर, विक्रांत भालसिंग, आदिनाथ शिरसाठ, अन्सार शेख, मोहिनी कर्डक आणि नितीन शिंदे यांच्या पथकाने महत्त्वाची भूमिका बजावली.
