महाराष्ट्र संवाद न्यूज ऑनलाईन
पारनेर तालुक्यात एक हृदयद्रावक घटना समोर आली आहे. पतीच्या अपघाती निधनामुळे नैराश्य आलेल्या एका महिलेने आपल्या एकुलत्या एक मुलीसह शेताजवळील तलावात उडी मारून आत्महत्या केली.
ही घटना १ ऑगस्ट रोजी पहाटे १:३० च्या सुमारास पारनेर तालुक्यातील कन्हेर ओहळ परिसरात उघडकीस आली. सुरेखा दत्तात्रेय औटी (वय ४२) आणि शिवांजली दत्तात्रेय औटी (वय २१) अशी आत्महत्या केलेल्या माय-लेकींची नावे आहेत.
या घटनेने परिसरात हळहळ व्यक्त होत आहे. सुमारे सहा महिन्यांपूर्वी, पारनेर रस्त्यावर झालेल्या एका अपघातात सुरेखा यांचे पती दत्तात्रेय औटी यांचे निधन झाले होते. पतीच्या अकाली निधनामुळे सुरेखा नैराश्यात होत्या.
पारनेर शहरात राहणाऱ्या सुरेखा आणि त्यांची मुलगी शिवांजली, नेहमीप्रमाणे ३१ जुलै रोजी सकाळी ११ वाजता शहरापासून दोन किलोमीटर अंतरावर असलेल्या त्यांच्या शेतात कामासाठी गेल्या होत्या. त्यांनी संध्याकाळी साडेसहा वाजेपर्यंत काम केले. मात्र, काम संपवून घरी परतण्याऐवजी त्यांनी शेताजवळील तलावात उडी घेऊन जीवन संपवले.
सायंकाळी ७ वाजून गेल्यावरही आई आणि बहीण घरी न परतल्याने, सुरेखा यांचा मुलगा तेजसने जवळच राहणाऱ्या चुलत्यांशी संपर्क साधला. त्यानंतर, नातेवाईक आणि शेजाऱ्यांनी दोघींचा शोध सुरू केला. रात्री ११ वाजेपर्यंत शोध लागला नाही, म्हणून त्यांनी पारनेर पोलीस ठाण्यात त्या दोघी हरवल्याची तक्रार दाखल केली.
पोलिसांनी तातडीने तपास सुरू करत सुरेखा यांच्या मोबाईलचे लोकेशन तपासले. तेंव्हा मोबाईलचे शेवटचे लोकेशन तलावाजवळ असल्याचे दिसून आले. या माहितीवरून पोलीस आणि नातेवाईकांनी तलावाच्या परिसरात शोध घेतला. रात्री दीड वाजता तलावाच्या काठावर सुरेखा यांची पिशवी आणि त्यातील मोबाईल पोलिसांना सापडला. जवळच तलावाच्या डोहात सुरेखा आणि शिवांजली यांचे मृतदेह तरंगताना दिसले. पोलिसांनी दोन्ही मृतदेह बाहेर काढून शवविच्छेदनासाठी टाकळी ढोकेश्वर येथील रुग्णालयात पाठवले. या घटनेमुळे संपूर्ण परिसरात शोककळा पसरली आहे. पोलीस याप्रकरणी पुढील तपास करत आहेत.
