महाराष्ट्र संवाद न्यूज ऑनलाईन वृत्त
संगमनेर, प्रतिनिधी:
राष्ट्र उभारणीसाठी समर्पित असलेल्या माजी विद्यार्थी व स्काऊट्स सेवाभावी संस्थेच्या अध्यक्षपदी नारायण इटप यांची पुन्हा एकदा निवड झाली आहे. संस्थेच्या नुकत्याच झालेल्या वार्षिक सर्वसाधारण सभेत ही घोषणा करण्यात आली.
या सभेमध्ये उपाध्यक्षपदी संभाजी कानवडे आणि दिगंबर बंदावणे, तर सचिवपदी नारायण उगले आणि खजिनदारपदी डॉ. संजय गुंजाळ यांची निवड झाली. कायदेशीर सल्लागार म्हणून भाऊसाहेब हांडे यांची नेमणूक करण्यात आली आहे. महाराष्ट्र मेडिकल फाउंडेशनचे संस्थापक अध्यक्ष डॉ. राधेशाम गुंजाळ हे या बैठकीच्या अध्यक्षस्थानी होते.
संस्थेच्या विश्वस्त मंडळातही फेरबदल करण्यात आले असून, शिवाजी डेंगळे, लक्ष्मण डांगे, याह्याखान पठाण, मुरलीधर बारेकर, विश्वनाथ वर्पे आणि भरत कुटे यांचीही पुन्हा विश्वस्त म्हणून निवड झाली आहे. या बैठकीला संस्थेचे अनेक सदस्य, समन्वयक आणि माजी पदाधिकारी उपस्थित होते.
२०१५ साली स्थापन झालेल्या या संस्थेने प्लास्टिक कचरा निर्मूलन आणि ग्रामीण भागातील स्काऊट केडरचे पुनरुज्जीवन करण्यासाठी महत्त्वपूर्ण काम केले आहे. संगमनेर आणि अकोले तालुक्यांमधील शाळा व महाविद्यालयांमध्ये विद्यार्थ्यांसाठी स्काऊट शिबिरे आयोजित करून त्यांच्यामध्ये जीवनमूल्ये आणि नागरिक जाण रुजवण्यासाठी संस्था कार्यरत आहे. याशिवाय, गरजूंना आर्थिक मदत करणे, शाळांना संगणक संच देणे आणि प्लास्टिकच्या दुष्परिणामांबाबत जनजागृती करणे असे अनेक समाजोपयोगी उपक्रम संस्था राबवत आहे.
