महाराष्ट्र संवाद न्यूज ऑनलाईन
अहिल्यानगर: जिल्हा पोलीस अधीक्षक सोमनाथ घार्गे यांनी गुरुवारी जिल्हा पोलीस दलातील सहा पोलीस निरीक्षकांच्या व जवळपास ११४ पोलीस कर्मचाऱ्यांच्या जिल्हा अंतर्गत बदल्या केल्या आहेत. संगमनेर शहर पोलीस ठाण्याच्या पोलीस निरीक्षकांवरील बदलीचे संकट टळले असले तरी संगमनेर तालुका पोलीस ठाण्याच्या निरीक्षकांची बदली करण्यात आली आहे.
संगमनेर तालुका पोलीस ठाण्याचे निरीक्षक देविदास ढुमणे यांची शिर्डीच्या साई मंदिरात मंदिर सुरक्षा अधिकारी म्हणून नियुक्ती करण्यात आली आहे. तर त्यांच्या रिक्त जागेवर नियंत्रण कक्षातून पोलीस निरीक्षक प्रवीण साळुंखे यांची वर्णी लागली आहे. साळुंखे संगमनेर तालुका पोलीस ठाण्याचे आता नवे पोलीस निरीक्षक असतील.
जिल्हा पोलीस अधीक्षक सोमनाथ घार्गे यांनी पोलीस दलात फेरबदल करताना नियंत्रण कक्षातील दोघा पोलीस निरीक्षकांना नव्या नियुक्त्या दिल्या आहे. गेल्या काही दिवसापासून बदलीची चर्चा असलेले संगमनेर शहर पोलीस ठाण्याचे पोलीस निरीक्षक रवींद्र देशमुख यांची मात्र बदली झालेली नाही. बदलत्या राजकीय समीकरणांमुळे संगमनेर मधील काही पोलिस अधिकाऱ्यांच्या बदल्यांची चर्चा सुरू होती.
नेवासा पोलीस ठाण्याचे पोलीस निरीक्षक धनंजय जाधव यांची बदली जिल्हा विशेष शाखेत करण्यात आली आहे. नियंत्रण कक्षातील पोलीस निरीक्षक महेश पाटील यांची बदली जाधव यांच्या रिक्त जागेवर नेवासा पोलीस ठाण्यात करण्यात आली आहे. सायबर पोलीस ठाण्याचे पोलीस निरीक्षक मोरेश्वर पेंदाम यांची बदली दहशतवाद विरोधी पथकात करण्यात आली आहे तर दहशतवाद विरोधी पथकातील पोलीस निरीक्षक अरविंद जोंधळे यांची नियुक्ती नियंत्रण कक्षात करण्यात आली.
संगमनेर तालुका पोलीस ठाण्याचे पोलीस निरीक्षक देविदास ढुमणे साई मंदिराची सुरक्षा बघतील तर त्यांच्या जागेवर नियंत्रण कक्षातून प्रवीण साळुंखे यांना पाठविण्यात आले आहे. तर गेल्या काही दिवसांपूर्वीच तडकफडकी नियंत्रण कक्षात बदली करण्यात आलेले एलसीबीचे पोलीस निरीक्षक दिनेश आहेर हे आता नियंत्रण कक्षाचे प्रभारी असतील. या शाखेचा तात्पुरता पदभार पोलीस निरीक्षक मोरेश्वर पेंदाम यांच्याकडे सोपविण्यात आला आहे.
