महाराष्ट्र संवाद न्यूज ऑनलाईन
पोलीस असल्याचे भासवून दोघा अज्ञात भामट्यांनी एका ज्येष्ठ नागरिकाचे ५५ हजार रुपये लुटल्याची घटना शनिवारी सकाळी घडली. यासंदर्भात पोलीस ठाण्यात गुन्हा दाखल करण्यात आला असून पोलीस पुढील तपास करत आहे.
रवींद्र नारायण राजहंस (वय ७४ वर्ष, रा. भिंगारदिवे मळा, सावेडी, अहिल्यानगर) असे फसवणूक झालेल्या ज्येष्ठ नागरिकाचे नाव आहे. राजहंस यांच्या तक्रारीवरून तोफखाना पोलीस ठाण्यात अज्ञात दोघा भामट्यांविरोधात गुन्हा दाखल करण्यात आला आहे.
शनिवारी राजहंस जॉगिंग पार्क जवळ दुचाकीवर थांबले होते त्यावेळी डोक्यावर हेल्मेट घातलेला एक इसम दुचाकीवरून आणि दुसरा पायी त्यांच्या जवळ आला. या दोघांनी आपण पोलीस असल्याचे राजहंस यांना सांगितले. त्यापैकी एकाने पोलिसाचे ओळखपत्र दाखवत राजहंस यांना सक्सेना नावाच्या व्यक्तीचा पत्ता विचारत त्यांचा विश्वास संपादन केला.
त्यांनी राजहंस यांच्या खिशातील मोबाईल आणि सुट्ट्या पैशासह हातातील दोन तोळ्याच्या सोन्याच्या व दोन तांब्याच्या अंगठ्या तात्पुरत्या सुरक्षित ठेवण्यासाठी पिशवीत ठेवत असल्याचे भासवले प्रत्यक्षात मात्र त्यांनी पिशवीत दागिने ठेवण्याऐवजी ते घेऊन पसार झाले.
फसवणूक झाल्याचे लक्षात आल्याने राजहंस यांनी तोफखाना पोलीस ठाण्यात धाव घेत अज्ञात दोघा भामट्यांनी फसवणूक केल्याची तक्रार दाखल केली. पोलीस उपनिरीक्षक योगेश चाहेर पुढील तपास करत आहे.
