महाराष्ट्र संवाद न्यूज ऑनलाईन
संगमनेर, प्रतिनिधी: नाशिक पदवीधर मतदार संघाचे आमदार सत्यजीत तांबे यांच्या वाढदिवसानिमित्त (२७ सप्टेंबर) ‘आय लव्ह संगमनेर’ संस्थेने पोलीस भरती, आर्मी भरतीसह इतर स्पर्धा परीक्षांची तयारी करणाऱ्या विद्यार्थ्यांसाठी एक विशेष अभियानाचे आयोजन केले आहे. या उपक्रमात तरुणांना मार्गदर्शन, सराव परीक्षा आणि शारीरिक चाचण्यांची तयारी करून घेतली जाईल. या माध्यमातून संगमनेर आणि अहिल्यानगर जिल्ह्यातील तरुणांसाठी एक मोठी संधी उपलब्ध झाली आहे.
आमदार सत्यजीत तांबे हे तरुणांना प्रोत्साहन देणारे आणि त्यांच्या विकासासाठी सातत्याने प्रयत्न करणारे नेते म्हणून ओळखले जातात. त्यांच्या याच कार्याचा एक भाग म्हणून ‘आय लव्ह संगमनेर’ या संस्थेने हा उपक्रम हाती घेतला आहे. यासंदर्भात माहिती देताना स्पर्धा परीक्षा प्रकल्प प्रमुख प्रवीण शिंदे म्हणाले, या स्पर्धा परीक्षांमध्ये विद्यार्थ्यांना मार्गदर्शन करण्यासाठी तज्ज्ञ मार्गदर्शक उपस्थित राहणार आहेत. येत्या दोन-तीन दिवसात या प्रक्रियेला सुरुवात होईल.
या विशेष अभियानात मिनी पोलीस भरती, आर्मी भरती, पॅरा मिलिटरी भरती यांच्यासाठी प्रशिक्षण दिले जाईल. तसेच, विविध स्पर्धा परीक्षांसाठी विशेष सराव परीक्षांचे आयोजन करण्यात येणार आहे. विशेष बाब म्हणजे ग्राउंड वरील सर्व परीक्षा चीपद्वारे रेकॉर्ड केल्या जाणार आहे.
यातील सर्वात खास गोष्ट म्हणजे, मैदानावर होणाऱ्या सर्व शारीरिक चाचण्या अत्याधुनिक चीपद्वारे (Chip) रेकॉर्ड केल्या जाणार आहेत, ज्यामुळे निकालात पूर्णपणे पारदर्शकता येईल. बाहेरगावाहून येणाऱ्या विद्यार्थ्यांसाठी राहण्याची आणि जेवणाची उत्तम सोय केली जाणार आहे.
या स्पर्धा परीक्षांसंदर्भात अधिक माहिती लवकरच ‘आय लव्ह संगमनेर’च्या www.ilovesangamner.org या अधिकृत वेबसाइटवर उपलब्ध होईल. इच्छुक उमेदवारांनी या संधीचा लाभ घ्यावा, असे आवाहन संयोजकांनी केले आहे.
