बिंगो जुगार अड्ड्यावर छापा; ४१,८८० रुपयांचा मुद्देमाल जप्त

महाराष्ट्र संवाद न्यूज ऑनलाईनअहिल्यानगर: भिंगार कॅम्प पोलीस स्टेशनच्या हद्दीत वाकोडी फाटा येथे सुरू असलेल्या एका बिंगो जुगार अड्ड्यावर उपविभागीय पोलीस अधिकारी अमोल भारती यांच्या पथकाने छापा टाकला आहे. या कारवाईत पोलिसांनी तीन आरोपींना ताब्यात घेतले असून, त्यांच्याकडून एकूण ४१,८८० रुपयांचा मुद्देमाल जप्त करण्यात आला आहे.

ही कारवाई गुरुवारी (१४ ऑगस्ट) करण्यात आली. पकडण्यात आलेल्या आरोपींची नावे मयूर प्रताप छजलानी (वय ३२), नरेश रामसिंग चव्हाण (वय ३५), आणि ओंकार नंदू बनसोडे (वय २२) अशी आहेत. हे तिघेही हरीमाळ दरेवाडी, सोलापूर रोड, अहिल्यानगर येथील रहिवासी आहेत. त्यांच्याकडून बिंगो खेळण्याचे साहित्य आणि रोख रक्कम पोलिसांनी जप्त केली.

जिल्हा पोलीस अधीक्षक आणि अप्पर पोलीस अधीक्षक, अहिल्यानगरयांच्या मार्गदर्शनाखाली ही कारवाई करण्यात आली. डीवायएसपी अमोल भारती यांच्या नेतृत्वाखालील पथकात पोलीस उपनिरीक्षक शिंदे, पोलीस हवालदार सुयोग सुपेकर, महेश मगर, पोलीस नाईक हेमंत खंडागळे आणि पोलीस कॉन्स्टेबल सागर द्वारके यांचा समावेश होता. या प्रकरणी भिंगार कॅम्प पोलीस स्टेशनमध्ये गुन्हा नोंद करण्यात आला आहे.