आमदार सत्यजीत तांबे यांच्याकडून संगमनेरकरांना गणेशोत्सवाच्या शुभेच्छा! म्हणाले, उत्सव शांततेत आणि…

महाराष्ट्र संवाद न्यूज ऑनलाईन

संगमनेर, प्रतिनिधी: नाशिक पदवीधर मतदार संघाचे आमदार सत्यजीत तांबे यांनी संगमनेर शहर आणि तालुक्यातील जनतेला गणेशोत्सवाच्या शुभेच्छा दिल्या आहेत. आपल्या प्रभा निवासस्थानी गणेशाची प्रतिष्ठापना केल्यानंतर त्यांनी माध्यमांशी संवाद साधला. यावेळी त्यांनी हा उत्सव शांततेत आणि सौहार्दपूर्ण वातावरणात साजरा करण्याचे आवाहन केले.

आमदार तांबे म्हणाले की, गणपती बाप्पाचं आगमन हे आपल्या सर्वांच्या आयुष्यात आनंद आणि समृद्धी घेऊन येतं. गणेशोत्सव आपल्याला नवीन कामांची सुरुवात करण्याची प्रेरणा देतो. संगमनेरकर नागरिक हे दहा दिवस मोठ्या उत्साहात हा सण साजरा करतात. विविध गणेश मंडळांचे आकर्षक देखावे पाहण्यासाठी शहरात गर्दी होते, तसेच वेगवेगळ्या खाद्यपदार्थांची चव घेण्यासाठी नागरिक उत्साही असतात.

यावेळी बोलताना त्यांनी नागरिकांना आवाहन केले की, हा सण साजरा करताना आपण सर्वांनी शांतता राखावी आणि प्रशासनाला सहकार्य करावे. पोलीस प्रशासन आणि नगरपालिकेने दिलेल्या सूचनांचे पालन करणे गरजेचे आहे. कायदा आणि सुव्यवस्थेचा आदर राखून आपण हा उत्सव साजरा करूया.

शेवटी, आपल्या कुटुंबाच्या वतीने सर्वांना गणेशोत्सवाच्या शुभेच्छा देत त्यांनी त्यांच्या निवासस्थानी प्रतिष्ठापना करण्यात आलेल्या श्री गणेशाचे संगमनेरकरांनी दर्शन घेऊन प्रसाद घेण्याचे आवाहन केले.