दुर्दैवी अंत: चुलत बहिणीच्या आत्महत्येपाठोपाठ समोर आली दुसरी घटना, पतीने पत्नीची हत्या करून केली आत्महत्या; संगमनेर हादरले

संगमनेर: 

गणेश विसर्जनाच्या दिवशी संगमनेरच्या पठार भागातील साकुर मध्ये दोन सख्या चुलत बहिणींनी आत्महत्या केल्याचा प्रकार ताजा असतानाच त्या पाठोपाठ संगमनेर शहराला हादरवून सोडणारी एक धक्कादायक घटना समोर आली आहे. प्रेमविवाह केलेल्या एका दाम्पत्याने टोकाचे पाऊल उचलत आपले जीवन संपवले. 

पतीने पत्नीची हत्या केल्यानंतर स्वतः गळफास घेऊन आत्महत्या केल्याची ही घटना शहरातील इंदिरानगर परिसरातील जय जवान चौकात घडली. या दुर्दैवी घटनेत वैष्णवी संजय खांबेकर (वय २२) आणि तिचा पती कुलदीप सुनील अडांगळे (वय ३५) यांचा अंत झाला.

वैष्णवी आणि कुलदीप यांचा दोन वर्षांपूर्वी प्रेमविवाह झाला होता. दोघेही जय जवान चौकातील घरात राहत होते. या संदर्भात अद्याप पोलिसांकडून अधिकृत माहिती मिळाली नसून मिळालेल्या प्राथमिक माहितीनुसार, दोघांमध्ये सतत घरगुती वाद होत होते. रविवारी सकाळी त्यांच्यातील वादाने उग्र रूप धारण केले आणि त्यातूनच ही दुर्दैवी घटना घडली असावी, असा कयास आहे.

रविवारी सकाळी पोलिसांना या घटनेची माहिती मिळाली. पोलीस घटनास्थळी पोहोचले, तेव्हा त्यांना घरात वैष्णवीचा मृतदेह खाली पडलेल्या अवस्थेत आढळला, तर कुलदीपचा मृतदेह पंख्याला लटकलेल्या अवस्थेत होता. पोलिसांनी तात्काळ दोन्ही मृतदेह घुलेवाडी येथील ग्रामीण रुग्णालयात शवविच्छेदनासाठी पाठवले.

कुलदीपच्या मृतदेहाचे शवविच्छेदन झाल्यानंतर, रविवारी संध्याकाळी त्याच्यावर अंत्यसंस्कार करण्यात आले. मात्र, वैष्णवीचा मृतदेह पुढील फॉरेन्सिक तपासणीसाठी लोणी प्रवरानगर येथे पाठवण्यात आला आहे. फॉरेन्सिक अहवाल आल्यानंतरच घटनेचा नेमका उलगडा होईल.

वैष्णवी ब्युटी पार्लरचा व्यवसाय करत होती. या घटनेमुळे परिसरात शोककळा पसरली आहे. या प्रकरणाची नोंद शहर पोलिसांनी आकस्मिक मृत्यू म्हणून केली असून तपास सुरू केला आहे. पोलीस निरीक्षक रवींद्र देशमुख यांच्या मार्गदर्शनाखाली पोलीस उपनिरीक्षक संतोष पगारे अधिक तपास करत आहेत. पोलिसांच्या हाती काही महत्त्वाचे धागेदोरे लागले असल्याची माहिती मिळत असून, लवकरच या घटनेमागील सत्य समोर येईल अशी अपेक्षा आहे.