‘सर्वधर्म समभाव’ जपणाऱ्या संस्थांना मानवाधिकार संस्थेकडून पुरस्कार जाहीर

संगमनेर – 

ईद-ए-मिलादुन्नबीची मिरवणूक यावर्षी केवळ धार्मिक उत्सवापुरती मर्यादित न राहता, सामाजिक जबाबदारीचे उत्तम उदाहरण ठरली आहे. पैगंबर मोहम्मद यांच्या शांतता, स्वच्छता आणि मानवतेच्या शिकवणुकीवर आधारित विविध उपक्रमांची दखल घेत, ह्युमन इनोवेशन ऑर्गनायझेशन आणि न्यूज एन एम पी परिवाराने काही संस्थांना पुरस्कार जाहीर केले आहेत.

यावर्षीच्या मिरवणुकीदरम्यान अनेक गट सक्रिय झाले होते. काही स्वयंसेवकांनी मिरवणूक संपल्यावर तात्काळ रस्त्यांची स्वच्छता केली आणि ‘स्वच्छता हाच धर्म’ असा संदेश दिला. त्यांच्या या कृतीचे नागरिकांनी विशेष कौतुक केले. त्याचप्रमाणे, एका गटाने नागरिकांसाठी मोफत आरोग्य तपासणी, उपचार आणि औषधे असलेले महाआरोग्य शिबिर आयोजित केले होते. यामुळे धार्मिक कार्यक्रमासोबतच आरोग्यसेवेचा लाभही लोकांना मिळाला.

इतर काही गटांनी पैगंबर मोहम्मद यांच्या मानवतावादी शिकवणुकीचा प्रसार केला. त्यांनी विविध माहितीपत्रके आणि ऐतिहासिक वस्तूंच्या साहाय्याने सर्वधर्म समभाव, सलोखा आणि एकता या मूल्यांचे महत्त्व लोकांना पटवून दिले.

या सर्व सामाजिक कार्याची दखल घेऊन एकता नगर सोशल ग्रुप, ह्युमन रिलीफ अल्पसंख्यांक फाउंडेशन, एन आर सी सी ग्रुप आणि मंत्री फाउंडेशन, मोगलपुरा मस्जिद ट्रस्टी आणि गवंडीपुरा मस्जिद ट्रस्टी या पाच संस्थांना पुरस्कार जाहीर करण्यात आले आहेत.

हा पुरस्कार सोहळा येत्या शुक्रवार, १२ सप्टेंबर २०२५ रोजी दुपारी ३:०० वाजता सय्यद बाबा चौक, संगमनेर, अहिल्यानगर येथे होणार आहे. हा कार्यक्रम विविध मान्यवरांच्या उपस्थितीत पार पडेल. या संदर्भातील घोषणा राष्ट्रीय अध्यक्ष वसीम उर्फ गुड्डूभाई सय्यद, महिला जिल्हाध्यक्ष बानोबी शेख आणि महासचिव जमीर शेख यांनी केली आहे.