महाराष्ट्र संवाद न्यूज ऑनलाईन संगमनेर: संगमनेर शहर पोलीस ठाण्याच्या हद्दीत खांडगाव शिवारात एका १५ वर्षीय अल्पवयीन मुलीवर अत्याचार केल्याची धक्कादायक घटना समोर आली आहे. याप्रकरणी पीडित मुलीच्या आईने दिलेल्या फिर्यादीवरून संगमनेर शहर पोलीस ठाण्यात गुन्हा दाखल करण्यात आला आहे. मिळालेल्या माहितीनुसार, बुधवारी (१५ जुलै) पहाटे तीन-चार वाजेच्या सुमारास खांडगाव शिवारात ही घटना घडली. आरोपी गणेश चंद्रभान गायकवाड याने पीडित मुलगी अल्पवयीन असल्याचा फायदा घेऊन तिला घरातून बोलावून घेतले. त्यानंतर तिच्यावर जबरदस्तीने शारीरिक संबंध ठेवले. हा प्रकार पीडितेच्या नातेवाईकांनी पाहिला असता, आरोपीने तुझ्या आईकडे जाऊ नको, नाहीतर कोण काय करते मी बघतो आणि एखाद्याला मारून टाकीन’ अशी जीवे मारण्याची धमकी दिली. या घटनेनंतर पीडितेच्या ३३ वर्षीय आईने संगमनेर शहर पोलीस ठाण्यात धाव घेऊन तक्रार नोंदवली. पोलिसांनी याप्रकरणी आरोपी गणेश चंद्रभान गायकवाड याच्याविरुद्ध भारतीय न्याय संहिता कलम ६४, ३५१(२) आणि बालकांचे लैंगिक अपराधांपासून संरक्षण अधिनियम (पोक्सो) २०१२ चे कलम ४, ६, ८, १२ अन्वेषणांतर्गत गुन्हा रजि. नं. ६८४/२०२६ नुसार गुन्हा दाखल केला आहे. घटनेची माहिती मिळताच उपविभागीय पोलीस अधिकारी डॉ. कुणाल सोनवणे आणि पोलीस निरीक्षक बारवकर यांनी घटनास्थळी भेट दिली असून, पोलीस उपनिरीक्षक संतोष पगारे या प्रकरणाचा पुढील तपास करत आहेत.
महाराष्ट्र संवाद न्यूज ऑनलाईन
