दोन वर्षांच्या चिमुरडीवर अत्याचार, नराधमाला मरेपर्यंत जन्मठेप

दोन वर्षांच्या चिमुरडीवर अत्याचार, नराधमाला मरेपर्यंत जन्मठेप

श्रीरामपूर –

श्रीरामपूर तालुक्यात एका दोन वर्षांच्या चिमुरडीवर लैंगिक अत्याचार केल्याच्या घृणास्पद घटनेत, विशेष न्यायालयाने आरोपी भास्कर धाकू मोरे याला मरेपर्यंत जन्मठेप आणि १० हजार रुपयांच्या दंडाची कठोर शिक्षा सुनावली आहे. या निकालाने पीडितेला न्याय मिळाला असल्याचे मानले जात आहे.

पीडित चिमुरडीला लघवी करताना त्रास होऊ लागला. कुटुंबीयांनी तिला उपचारासाठी आणले असता, तपासणी करणाऱ्या परिचारिकेला तिच्यावर लैंगिक अत्याचार झाल्याचे लक्षात आले. अधिक चौकशी केली असता, चिमुरडीने आरोपी भास्कर मोरे याने केलेल्या कृत्याची माहिती दिली. तेव्हा ही धक्कादायक घटना उघडकीस आली होती.

या घटनेची गंभीर दखल घेत, श्रीरामपूर शहर पोलीस ठाण्यात तात्काळ भारतीय दंड विधान कलम ३७६ (अ) (ब) सह पोक्सो कायद्याच्या कलम ४, ६, ८, १२ अंतर्गत गुन्हा दाखल करण्यात आला. पोलीस उपनिरीक्षक सुरेखा देवरे यांनी या प्रकरणाचा सखोल तपास करून आरोपीविरुद्ध दोषारोपपत्र दाखल केले.

या खटल्याची सुनावणी विशेष न्यायाधीश एस. एन. साळवे यांच्या न्यायालयात झाली. यात एकूण सात साक्षीदारांची साक्ष नोंदवण्यात आली, यात पीडितेची आई, तपास करणाऱ्या परिचारिका आणि ग्रामीण रुग्णालयातील वैद्यकीय अधिकारी यांच्या साक्षी निर्णायक ठरल्या. सरकारी पक्षाने सादर केलेले भक्कम पुरावे आणि साक्षीदारांच्या महत्त्वाच्या पुराव्यामुळे न्यायालयाला आरोपीला दोषी ठरवणे शक्य झाले.

सरकारी पक्षाच्या वतीने विशेष सरकारी वकील पी. पी. गटणे आणि एम. आर. नवले यांनी प्रभावी युक्तिवाद केला. न्यायालयाने सरकारी पक्षाचा दावा स्वीकारून आरोपीचा बचाव फेटाळला आणि त्याला मरेपर्यंत जन्मठेप व १० हजार रुपयांच्या दंडाची शिक्षा ठोठावली.

या प्रकरणाच्या तपासात पोलीस उपनिरीक्षक व्ही. आर. घाणे आणि हवालदार ठोंबरे यांनी महत्त्वपूर्ण सहकार्य केले.