शिर्डीत अल्पवयीन मुलांना भीक मागण्यास, हार-फुले-फोटो विकण्यास लावणाऱ्या पालकांवर गुन्हे दाखल; अप्पर पोलीस अधीक्षकांच्या मार्गदर्शनाखाली पहिलीच मोठी कारवाई
शिर्डी-
शिर्डीत भीक मागणाऱ्या आणि विविध वस्तू विकणाऱ्या अल्पवयीन मुलांवर कारवाई करण्यात आली असून, त्यांच्या पालकांवरही गुन्हे दाखल करण्यात आले आहेत. अप्पर पोलीस अधीक्षक सोमनाथ वाघचौरे यांच्या मार्गदर्शनाखाली ही विशेष मोहीम राबवण्यात आली, यामध्ये १२ मुलांना बाल कल्याण समितीकडे सोपवण्यात आले. शिर्डी मंदिर परिसरात अशा प्रकारची कारवाई होण्याची ही पहिलीच वेळ आहे.
या कारवाईमध्ये, भीक मागणे, हार, फुले आणि फोटो विकणे अशा कामांमध्ये गुंतलेल्या १२ मुलांची सुटका करण्यात आली. या मुलांचे शैक्षणिक भविष्य धोक्यात आले होते. काही मुले नशेच्या आहारी जाऊन भाविकांना त्रास देत असल्याच्या तक्रारीही आल्या होत्या.
पोलिसांनी या मुलांचे जबाब नोंदवून त्यांना बाल कल्याण समितीसमोर हजर केले. समितीच्या आदेशानुसार, या मुलांना संगमनेर आणि श्रीरामपूर येथील आधारगृहांमध्ये पाठवण्यात आले आहे.
या मोहिमेची सर्वात महत्त्वाची बाब म्हणजे केवळ मुलांची सुटका करून ती आधारगृहात पाठवण्यावर ही कारवाई थांबली नाही. मुलांचे शैक्षणिक भविष्य उद्ध्वस्त करणाऱ्या आणि त्यांना दुर्लक्षित आयुष्य जगण्यास भाग पाडणाऱ्या त्यांच्या पालकांविरुद्धही गुन्हा दाखल करण्यात आला आहे.
शिर्डी पोलीस ठाण्यात बाल न्याय अधिनियम, कलम ७५ आणि ७६ नुसार, १२ मुलांच्या १२ पालकांवर गुन्हे नोंदवले गेले आहेत. हे गुन्हे दखलपात्र आणि अजामीनपात्र असून, पालकांना लवकरच अटक करण्यात येईल, अशी माहिती अप्पर पोलीस अधीक्षक सोमनाथ वाघचौरे यांनी दिली.
गेल्या काही महिन्यांपासून शिर्डी शहरात अशाच अल्पवयीन मुलांकडून विविध गुन्हे घडल्याचेही समोर आले होते. भाविकांची सुरक्षितता सुनिश्चित करण्याच्या दृष्टीने ही कारवाई महत्त्वाची ठरली असल्याचे वाघचौरे यांनी सांगितले. भाविकांचे शिर्डीतील आगमन, वास्तव्य आणि परतीचा प्रवास सुरक्षित करण्यासाठी ही मोहीम घेण्यात आली आहे.
