रीलसाठीचा स्टंट भोवला, पोलिसांनी रॅश ड्रायव्हिंग करणाऱ्या युवकावर केला गुन्हा दाखल; बघा आपबीतीचा व्हिडिओ…

संगमनेर – 

संगमनेर शहर पोलिसांनी बेदरकारपणे दुचाकी चालवून अपघात करणाऱ्या एका तरुणावर गुन्हा दाखल केला आहे. श्रीरामपूरचे अपर पोलीस अधीक्षक सोमनाथ वाघचौरे यांनी दिलेल्या माहितीनुसार, हा अपघात शहरातील जुन्या पुणे-नाशिक महामार्गावरील संगमनेर कॉलेज आणि १३२ केव्ही सबस्टेशनजवळ घडला.

हा अपघात एका व्हायरल झालेल्या व्हिडिओमुळे समोर आला. व्हिडिओमध्ये, यश अनुप अरगडे (वय २०), रा. गुंजाळवाडी, संगमनेर, हा त्याच्या रॉयल एनफिल्ड जीटी ६५० (क्रमांक एमएच ०४ एलए २५३१) दुचाकीला मुख्य रस्त्याऐवजी भरधाव वेगात फूटपाथवरून चालवत होता. २६ ऑगस्ट २०२५ रोजी रात्री १२:३० च्या सुमारास घडलेल्या या अपघातात यश स्वतः आणि त्याचा मित्र प्रतीक सचिन गुंजाळ (वय १८) दोघेही गंभीर जखमी झाले.

हा व्हिडिओ फेसबुक आणि इन्स्टाग्रामवर व्हायरल झाला होता. पोलिसांनी या घटनेची गंभीर दखल घेत, व्हिडिओची सत्यता पडताळून पाहिली आणि वरिष्ठांच्या आदेशानुसार कायदेशीर कारवाई केली. तपासात असे निष्पन्न झाले की, यशचा मित्र शिवम दिघे याने आपल्या मोबाईलमध्ये हा व्हिडिओ शूट केला आणि नंतर तो सोशल मीडियावर व्हायरल केला. पोलिसांनी शिवमवरही यशला गुन्हा करण्यास चिथावणी दिल्याबद्दल गुन्हा दाखल केला आहे.

याप्रकरणी, पोलीस उपनिरीक्षक श्रीकांत सावंत यांनी सरकारतर्फे फिर्याद दाखल केली आहे. संगमनेर शहर पोलीस ठाण्यात भारतीय न्याय संहिता कलम २८१, १२५(अ), (ब), ४९ आणि मोटार वाहन कायद्याच्या कलम १८४, १८९ नुसार गुन्हा क्रमांक ८४२/२०२५ दाखल करण्यात आला आहे.

या घटनेच्या पार्श्वभूमीवर, संगमनेर पोलिसांनी नागरिकांना आवाहन केले आहे की, शहरात किंवा तालुक्यात कोणीही बेदरकारपणे वाहन चालवताना आढळल्यास त्यांच्यावर गंभीर स्वरूपाचे गुन्हे दाखल केले जातील, अशी माहिती अपर पोलीस अधीक्षक सोमनाथ वाघचौरे, पोलीस उपाधीक्षक कुणाल सोनवणे, पोलीस निरीक्षक रवींद्र देशमुख यांनी दिली.