अहिल्यानगर, विशेष प्रतिनिधी – नगरच्या स्थानिक गुन्हे शाखेने (LCB) एका मोठ्या दरोड्याचा कट उधळून लावला असून, कुख्यात गुंड गौरव घायाळ आणि त्याच्या चार साथीदारांना अटक केली आहे. त्यांच्याकडून एक पिस्तूल, तलवार, आणि इतर साहित्य असा एकूण ७.९० लाख रुपयांचा मुद्देमाल जप्त करण्यात आला आहे. ही धडाकेबाज कारवाई नगर-पुणे महामार्गावरील चास घाटाजवळ रात्रीच्या वेळी करण्यात आली.
पोलीस अधीक्षक सोमनाथ घार्गे आणि स्थानिक गुन्हे शाखेचे पोलीस निरीक्षक किरणकुमार कबाडी यांच्या आदेशानुसार, गुन्हेगारीला आळा घालण्यासाठी आणि गंभीर गुन्ह्यांचा तपास करण्यासाठी एक विशेष पथक तयार करण्यात आले होते. या पथकामध्ये सहाय्यक पोलीस निरीक्षक हरीष भोये, उपनिरीक्षक अनंत सालगुडे यांच्यासह पोलीस अंमलदार लक्ष्मण खोकले, हृदय घोडके, दीपक घाटकर, राहुल द्वारके, सुरेश माळी, अतुल लोटके, भीमराज खर्से, बाळासाहेब नागरगोजे, रिचर्ड गायकवाड, राहुल डोखे, सोमनाथ झांबरे, भगवान थोरात, विशाल तनपुरे, योगेश कर्डिले, भगवान धुळे, आणि महादेव भांड यांचा समावेश होता.
२० सप्टेंबरच्या रात्री हे पथक नगर तालुका पोलीस ठाण्याच्या हद्दीत गस्त घालत असताना, सहाय्यक पोलीस निरीक्षक हरीष भोये यांना गुप्त माहिती मिळाली की, चास घाटाजवळ एक काळ्या रंगाची इनोव्हा (क्रमांक MH 01 VA 7422) थांबलेली आहे. या गाडीत कुख्यात गुंड गौरव घायाळ आणि त्याचे ३ ते ४ साथीदार दरोड्याच्या तयारीत आहेत.
मिळालेल्या माहितीची खात्री करण्यासाठी पथकाने रात्री ३:५० वाजता घटनास्थळी धाव घेतली. तिथे त्यांना सांगितल्याप्रमाणे एक इनोव्हा गाडी अंधारात उभी दिसली. पोलिसांनी मोठ्या शिताफीने त्या गाडीतील संशयितांना ताब्यात घेतले. गौरव हरीभाऊ घायाळ (वय २४, रा. सुपा, ता. पारनेर, जि. अहिल्यानगर), सतिष बाळासाहेब पावडे (वय ३५, मूळ रा. दरोडी, ता. पारनेर, हल्ली रा. सुपा, ता. पारनेर, जि. अहिल्यानगर), अनिकेत रमेश साळवे (वय २९, रा. ओम एंटरप्रायझेसच्या पाठीमागे, सुपा, ता. पारनेर, जि. अहिल्यानगर), विशाल सुरेश जाधव (वय २३, रा. अपधूप रोड, सुपा, ता. पारनेर, जि. अहिल्यानगर) व गोविंद बबनराव गाडे (वय ३६, रा. ग्रामपंचायत मागे, सुपा, ता. पारनेर, जि. अहिल्यानगर) अशी असल्याचे तपासात समोर आले.
पोलीस पथकाने संशयितांना अंधारात थांबण्याचे कारण विचारले असता, त्यांनी समाधानकारक उत्तर दिले नाही. त्यानंतर पोलिसांनी त्यांची अंगझडती घेतली असता तपासणीदरम्यान पोलिसांनी आरोपींकडून मोठा मुद्देमाल जप्त केला. यामध्ये ३०,००० रुपये किमतीचे १ पिस्तूल, १ जिवंत काडतूस, ५०० रुपये किमतीची १ तलवार, १०० रुपये किमतीचा १ गिलव्हर, १ बेसबॉलचा दांडका, ६०,००० रुपये किमतीचे ६ मोबाईल फोन आणि ७ लाख रुपये किमतीची इनोव्हा गाडी, असा एकूण ७ लाख ९० हजार ६०० रुपयांचा मुद्देमाल आहे.
मुख्य आरोपी गौरव घायाळ याच्याविरुद्ध सुपा, पारनेर, नगर आणि इतर पोलीस ठाण्यांमध्ये गंभीर स्वरूपाचे गुन्हे दाखल आहेत. या सर्व आरोपींविरुद्ध अहिल्यानगर तालुका पोलीस ठाण्यात भारतीय न्याय संहिता २०२३ च्या कलम ३१० (४), ३१० (५), ३१० (६) आणि आर्म्स ॲक्ट ३/२५, ४/२५ नुसार दरोड्याच्या तयारीचा गुन्हा दाखल करण्यात आला आहे.
जप्त केलेला मुद्देमाल आणि आरोपींना पुढील तपासासाठी अहिल्यानगर तालुका पोलीस ठाण्यात हजर करण्यात आले आहे. पोलीस अधीक्षक सोमनाथ घार्गे यांच्या मार्गदर्शनाखाली स्थानिक गुन्हे शाखेने केलेल्या या यशस्वी कारवाईमुळे जिल्ह्यातील संभाव्य मोठा गुन्हा टळला आहे.
दरोड्याचा कट उधळला, कुख्यात गौरव घायाळ टोळी जेरबंद
पथकामध्ये सहाय्यक पोलीस निरीक्षक हरीष भोये, उपनिरीक्षक अनंत सालगुडे यांच्यासह पोलीस अंमलदार लक्ष्मण खोकले, हृदय घोडके, दीपक घाटकर, राहुल द्वारके, सुरेश माळी, अतुल लोटके, भीमराज खर्से, बाळासाहेब नागरगोजे, रिचर्ड गायकवाड, राहुल डोखे, सोमनाथ झांबरे, भगवान थोरात, विशाल तनपुरे, योगेश कर्डिले, भगवान धुळे, आणि महादेव भांड यांचा समावेश होता.
