आमदार सत्यजित तांबेंच्या प्रयत्नांमुळे संगमनेर तालुक्यातील तीर्थक्षेत्रांसाठी ५० लाख रुपयांचा निधी

संगमनेर (प्रतिनिधी): राज्याचे माजी मंत्री आणि काँग्रेसच्या राष्ट्रीय वर्किंग कमिटीचे सदस्य बाळासाहेब थोरात यांच्या नेतृत्वाखाली संगमनेर तालुक्याचा सर्वांगीण विकास सुरूच आहे. तालुक्यात विविध तीर्थक्षेत्रांच्या विकासासाठी सातत्याने प्रयत्न केले जात असून, आता आमदार सत्यजित तांबे यांच्या पाठपुराव्यामुळे क वर्ग तीर्थक्षेत्र विकास योजने अंतर्गत ५० लाख रुपयांचा निधी मंजूर झाला आहे. यामुळे तालुक्यातील पाच महत्त्वाच्या तीर्थक्षेत्रांचा विकास होणार आहे.

हा निधी श्रीक्षेत्र वेल्हाळे येथील हरीबाबा देवस्थान आणि इतर चार गावांच्या तीर्थक्षेत्रांसाठी मंजूर झाला आहे. आमदार तांबे यांनी वेल्हाळे येथील हरीबाबा देवस्थानला ‘क’ वर्ग तीर्थक्षेत्राचा दर्जा मिळावा यासाठी सातत्याने पाठपुरावा केला होता. माजी मंत्री बाळासाहेब थोरात यांनीही यापूर्वी वेळोवेळी या देवस्थानला विविध योजनांमधून निधी उपलब्ध करून दिला आहे. यामुळे भाविकांना चांगल्या सुविधा मिळत असून, आता या नवीन निधीमुळे विकासकामांना आणखी गती मिळणार आहे.

या मंदिरांना मिळणार निधी:

• मौजे कसारा दुमारा: श्रीहरी पुरुषोत्तम मंदिरासाठी स्नानगृह व स्वच्छतागृह बांधण्यासाठी १० लाख रुपये.
• संगमनेर खुर्द: अमृतेश्वर मंदिर देवस्थान परिसर सुशोभीकरणासाठी १० लाख रुपये.
• खांजापूर: अग्नेश्वर देवस्थान परिसर सुशोभीकरणासाठी १० लाख रुपये.
• सायखिंडी: अमर गिरी महाराज मंदिर परिसर सुशोभीकरणासाठी १० लाख रुपये.
• पारेगाव बुद्रुक: रेणुका माता मंदिर देवस्थान परिसर सुशोभीकरणासाठी १० लाख रुपये.

या मंजूर निधीमुळे तीर्थक्षेत्रांच्या सुशोभीकरणासोबतच भाविकांना आवश्यक सोयीसुविधा उपलब्ध करून देण्यात येणार आहेत. या महत्त्वपूर्ण योगदानाबद्दल वेल्हाळे, संगमनेर खुर्द, कसारा दुमारा, खांजापूर, सायखिंडी आणि पारेगाव बुद्रुक येथील ग्रामस्थांनी बाळासाहेब थोरात आणि आमदार सत्यजित तांबे यांचे आभार मानले आहेत.

बाळासाहेब थोरात यांच्या नेतृत्वाखाली तालुक्याचा विकास- बाळासाहेब थोरात यांच्या नेतृत्वाखाली संगमनेर तालुक्यात अनेक विकासकामे झाली आहेत. तालुक्यातील अनेक तीर्थक्षेत्रे पर्यटन विकास योजनेअंतर्गत विकसित केली गेली आहेत. आता नव्याने मंजूर झालेल्या ५० लाख रुपयांच्या निधीमुळे पाच तीर्थक्षेत्रांना नवीन रूप मिळणार आहे. विशेषतः हरीबाबा देवस्थानच्या विकासासाठी आमदार सत्यजित तांबे यांनी केलेल्या विशेष प्रयत्नांमुळे स्थानिक ग्रामस्थांमध्ये समाधानाचे वातावरण आहे. हे देवस्थान नाशिक-पुणे महामार्गालगत असल्याने याचा फायदा मोठ्या संख्येने भाविकांना होईल.