नवरात्रौत्सवानिमित्त ‘आय लव संगमनेर’च्यावतीने २४ ते २७ सप्टेंबर दरम्यान महिलांसाठी ‘खेळ पैठणीचा’ कार्यक्रमाचे आयोजन

संगमनेर – आमदार सत्यजित तांबे यांच्या संकल्पनेतून सुरू झालेल्या ‘आय लव संगमनेर’ चळवळीच्यावतीने नवरात्र महोत्सवाच्या निमित्ताने महिलांसाठी ‘खेळ पैठणीचा’ या विशेष कार्यक्रमाचे आयोजन करण्यात आले आहे. संगमनेर शहरात २४ सप्टेंबर ते २७ सप्टेंबर २०२५ या काळात दररोज रात्री ७ ते १० या वेळेत हा कार्यक्रम होणार आहे. महिलांमध्ये मैत्री आणि आनंदाचे वातावरण निर्माण करणे हा या कार्यक्रमाचा मुख्य उद्देश आहे, अशी माहिती प्रकल्प प्रमुख डॉ. मैथिलीताई तांबे यांनी दिली आहे.

माजी मंत्री बाळासाहेब थोरात आणि माजी आमदार डॉ. सुधीर तांबे यांच्या नेतृत्वाखाली संगमनेर शहर व तालुक्याने विकासातून वैभव प्राप्त केले आहे. शहराची समृद्ध सांस्कृतिक परंपरा जपण्यासाठी ‘सौ शहरी एक संगमनेरी’ हे ब्रीदवाक्य घेऊन ‘आय लव संगमनेर’ ही चळवळ कार्यरत आहे. नवरात्रीचे हे आनंदाचे पर्व महिलांचा सन्मान करणारे आहे, असे डॉ. मैथिलीताई तांबे यांनी सांगितले.

हा ‘खेळ पैठणीचा’ कार्यक्रम २५ सप्टेंबर ते २७ सप्टेंबर २०२५ या दरम्यान शहरातील विविध ठिकाणी आयोजित करण्यात आला आहे. या कार्यक्रमांना नगराध्यक्षा दुर्गाताई तांबे, कॅन्सरतज्ज्ञ डॉ. जयश्रीताई थोरात आणि डॉ. मैथिलीताई तांबे उपस्थित राहणार आहेत.

या कार्यक्रमात महिलांसाठी विविध खेळ, मजेदार स्पर्धा, प्रश्नमंजुषा आणि लकी ड्रॉचे आयोजन करण्यात आले आहे. सहभागी होणाऱ्या तसेच उपस्थित महिलांसाठी राजेशाही पैठणी, घरगुती वापराच्या वस्तू आणि इतर आकर्षक बक्षिसे दिली जाणार आहेत.

युवक-युवतींच्या कलागुणांना वाव देण्यासाठी निर्माण करण्यात आलेल्या ‘आय लव संगमनेर’, जय हिंद महिला मंच आणि एकविरा फाउंडेशनच्यावतीने शहरातील जास्तीत जास्त महिला आणि तरुणींनी या कार्यक्रमात सहभागी व्हावे, असे आवाहन करण्यात आले आहे.