संगमनेर: नाशिक परिमंडळात अहिल्यानगर मंडळांतर्गत येणाऱ्या संगमनेर विभागातील वीज वितरण सेवा अधिक कार्यक्षम करण्यासाठी महाराष्ट्र राज्य विद्युत वितरण कंपनीने (महावितरण) महत्त्वाचा निर्णय घेतला आहे. संगमनेर उपविभाग-१ आणि २ चे विभाजन करून नवीन ‘संगमनेर उपविभाग-३’ स्थापन करण्यास महावितरणने मंजुरी दिली आहे.
नवीन उपविभाग-३ च्या पद निर्मितीसाठी वार्षिक १,२६,७३,०९२ इतका खर्च तसेच कार्यालय निर्मितीसाठी १२ लाख रुपयांच्या प्रशासकीय खर्चास मंजुरी मिळाली असल्याचे आमदार खताळ यांच्या कार्यालयाकडून सांगण्यात आले आहे.
प्रशासकीय कामकाजातील अडचणी कमी व्हाव्यात, तसेच नागरिकांना सुलभ आणि जलद सेवा मिळावी यासाठी हा निर्णय घेण्यात आला आहे. संगमनेर भागात शेती पंपधारक, ग्राहक आणि व्यावसायिक यांची मोठी संख्या असल्याने वीज जोडणीस होणारा उशीर, तांत्रिक बिघाड दुरुस्तीस लागणारा वेळ, तसेच बिलिंग आणि मीटर संबंधित तक्रारींचा प्रचंड भार होता. ग्रामीण भागात सेवा पोहोचण्यास होणारा विलंब कमी करण्यासाठी या नवीन उपविभागाची आवश्यकता होती.
या उपविभागाच्या स्थापनेसाठी आमदार अमोल खताळ पाटील यांनी ऊर्जा राज्यमंत्री मेघना बोर्डीकर यांच्याकडे पाठपुरावा केला. त्यांच्या प्रयत्नांना यश येऊन महावितरणने हा निर्णय घेतला आहे.
उपविभाग-३ च्या आस्थापनेवर उपकार्यकारी अभियंता, कनिष्ठ अभियंता, लिपिक व शिपाई अशा एकूण १२ पदांची निर्मिती करण्यात आली आहे. नवीन उपविभाग-३ अंतर्गत घारगाव-१ व २, साकुर, चंदनापुरी, धांदरफळ आणि मंगळापूर या शाखा कार्यालयांचा समावेश करण्यात आला आहे. यामुळे परिसरातील नागरिकांना दर्जेदार आणि तत्पर सेवा मिळण्याचा मार्ग मोकळा झाला आहे.
- महावितरणच्या शाखा कार्यालयांच्या पुनर्विभाजनानंतर संगमनेर उपविभाग -१ अंतर्गत संगमनेर शहर शाखा १ व २, जवळे कडलग, निमोन, आणि कुरण शाखा
- उपविभाग -२ अंतर्गत आश्वी-१, आश्वी-२, निमगाव जाळी, वडगाव पान, पिंपरने, जोर्वे व तळेगाव शाखा.
- उपविभाग-३ अंतर्गत घारगाव १, घारगाव- २, साकुर, चंदनापुरी, धांदरफळ आणि मंगळापुर शाखा कार्यालये कार्यरत राहतील.
संगमनेर महावितरणचा उपविभाग-३ सुरू: आमदार खताळ यांचा पाठपुरावा
नवीन उपविभाग-३ च्या पद निर्मितीसाठी वार्षिक १,२६,७३,०९२ इतका खर्च तसेच कार्यालय निर्मितीसाठी १२ लाख रुपयांच्या प्रशासकीय खर्चास मंजुरी मिळाली असल्याचे आमदार खताळ यांच्या कार्यालयाकडून सांगण्यात आले आहे.
