संगमनेर – यवतमाळ जिल्ह्यातील उमरखेड तालुक्यातील ढाकणी या गावी एका अल्पवयीन शालेय विद्यार्थिनीवर झालेल्या अमानुष अत्याचाराच्या घटनेने संपूर्ण राज्याला हादरवून सोडले आहे. या दुःखद घटनेत पीडित मुलीचा मृत्यू झाला असून, पोलिसांनी तत्परता दाखवत आरोपीला अटक केली आहे. या क्रूर कृत्याविरोधात संगमनेरच्या पद्मशाली समाज मंडळ, आणि महिला पद्माशाली समाज मंडळच्यावतीने सोमवारी तीव्र संताप आणि निषेध व्यक्त करण्यात आला.
समाज बांधवांमध्ये या घटनेमुळे प्रचंड रोष असून, दोषी आरोपीला फाशीची कठोर शिक्षा व्हावी आणि पीडित कुटुंबाला त्वरित न्याय मिळावा, या प्रमुख मागणीसाठी हा निषेध नोंदविण्यात आला. पद्मशाली समाज मंडळाचे अध्यक्ष गणेश सायन्ना मादास आणि महिला पद्माशाली समाज मंडळाच्या अध्यक्षा लक्ष्मी दत्तात्रय इटप यांच्या नेतृत्वाखालील सर्व पदाधिकारी आणि समाज बांधव मोठ्या संख्येने एकत्र आले होते.
या निषेधानंतर समाजाच्या शिष्टमंडळाने संगमनेर प्रांत कार्यालय येथे उपविभागीय अधिकाऱ्यांकडे निवेदन देण्यात आले असून या निवेदनाद्वारे, घटनेची नोंद घेऊन दोषींवर ‘फास्ट ट्रॅक’ पद्धतीने त्वरित कठोर कारवाई व्हावी, अशी मागणी करण्यात आली आहे.
हे निवेदन गृहमंत्री, जिल्हाधिकारी, पोलीस अधीक्षक यांना पाठविण्यात आले आहे. समाजाने एकत्रित येत, पीडितेला न्याय मिळेपर्यंत आपला तीव्र संघर्ष सुरूच ठेवण्याचा एल्गार यावेळी दिला आहे.
Post Views: 772
