पोलिसांनी दाखवली तत्परता, महसूल विभागाच्या कार्यक्षमतेवर मोठे प्रश्नचिन्ह
संगमनेर: अवैध वाळू वाहतुकीला आळा घालण्याची मुख्य जबाबदारी असलेल्या महसूल विभागाचे अधिकारी आणि कर्मचारी नदीपात्रालगत ‘घिरट्या’ मारण्यात व्यस्त असताना, संगमनेर शहर पोलिसांनी अत्यंत सतर्कता दाखवत वाळू माफियांना चांगलाच दणका दिला आहे. पोलीस उपनिरीक्षक रावसाहेब लोखंडे यांच्या नेतृत्वाखाली झालेल्या या कारवाईत ३ लाख ५ हजार रुपयांचा मुद्देमाल जप्त करण्यात आला आहे. विशेष म्हणजे, महसूल विभागाने या गंभीर घटनेवर अद्यापही कोणतीही ठोस भूमिका घेतलेली नाही, ज्यामुळे त्यांच्या कार्यक्षमतेवर मोठे प्रश्नचिन्ह उभे राहिले आहे.
कोल्हेवाडी रोड परिसरात अवैध वाळू वाहतूक सुरू असल्याची गोपनीय माहिती पोलीस उपनिरीक्षक लोखंडे यांना मिळाली होती. मिळालेल्या माहितीवर तात्काळ विश्वास ठेवून, त्यांनी आपल्या पथकासह कोल्हेवाडी रोड पोलीस चौकीजवळ रात्री १:३० वाजता पाळत ठेवली. यावेळी, विना नंबर प्लेट आणि वाळूने भरलेल्या सिल्वर पांढऱ्या रंगाच्या महिंद्रा झेनॉन गाडीचा पोलिसांनी पाठलाग करून तिला ताब्यात घेतले.
गाडीचा चालक ज्ञानेश्वर सुरेश लोटे (वय २५, रा. साईनगर) याने सुरुवातीला उडवाउडवीची उत्तरे दिली. परंतु, पोलिसांनी पोलिसी खाक्या दाखवताच, त्याने वाहतुकीचा कोणताही परवाना नसताना अवैध वाळूची वाहतूक करत असल्याची कबुली दिली.
वाळूचे उत्खनन आणि वाहतूक यावर नियंत्रण ठेवण्याची थेट जबाबदारी महसूल विभागाची असताना, वाळू माफियांना पकडण्याचे काम शहर पोलिसांना का करावे लागले, हा गंभीर प्रश्न या निमित्ताने उपस्थित झाला आहे. महसूल विभागाचे अधिकारी केवळ नदीच्या वेगवेगळ्या भागांना ‘भेटी’ देण्यात आणि नियम धाब्यावर बसवण्यात व्यस्त असल्याने, अवैध वाळू उत्खनन आणि वाहतुकीचा उत्साह अजूनही जोरात असल्याचे या घटनेतून स्पष्ट झाले आहे. महसूल विभागाच्या या निष्क्रियतेमुळे शासनाच्या महसुलाचे मोठे नुकसान होत असून, पर्यावरणाचा समतोलही बिघडत आहे.
पोलिसांनी वाळूसह वाहन ताब्यात घेतले असून पोलीस कॉन्स्टेबल शरद बाबुराव पोकळे यांच्या फिर्यादीनुसार संगमनेर शहर पोलीस ठाण्यात आरोपी ज्ञानेश्वर लोटेविरुद्ध गुन्हा रजिस्टर नंबर ८९०/२०२५ नुसार बी.एन.एस. कलम ३०३ आणि २ प्रमाणे गुन्हा दाखल केला आहे. या कारवाईतील एकूण तीन लाख पाच हजार रुपयांचा मुद्देमाल जप्त करण्यात आला असून, पुढील तपास पोलीस निरीक्षक रवींद्र देशमुख यांच्या मार्गदर्शनाखाली पोलीस हेडकॉन्स्टेबल पारधी हे करत आहेत.
