लाचेची मागणी करणाऱ्या पोलिस उपनिरीक्षकास छत्रपती संभाजीनगरमध्ये अटक

छत्रपती संभाजीनगर: मुकुंदवाडी पोलीस ठाण्यात कार्यरत असलेल्या एका पोलीस उपनिरीक्षकाला लाचलुचपत प्रतिबंधक विभागाने ८,००० रुपयांची लाच घेताना रंगेहाथ पकडले आहे. तक्रारदाराच्या भावाविरुद्ध दाखल असलेल्या शस्त्र अधिनियम गुन्ह्यात मदत करण्यासाठी आरोपी पोलीस उपनिरीक्षक वसंत राऊत (वर्ग २) यांनी ही लाच स्वीकारली.

आरोपी लोकसेवक, वसंत राऊत (वय ४३ वर्षे) हे मुकुंदवाडी पोलीस ठाण्यात कार्यरत असून तक्रारदाराच्या भावाविरुद्ध मुकुंदवाडी पोलीस ठाण्यात शस्त्र अधिनियम कायद्यान्वये गुन्हा दाखल होऊन त्याला अटक करण्यात आली होती. सदर गुन्ह्यात मदत करणे, पुढील कायदेशीर प्रक्रियेत सहकार्य करणे आणि न्यायालयात जामीन मिळवण्यासाठी मदत करण्याच्या मोबदल्यात आरोपी राऊत यांनी तक्रारदाराकडे सुरुवातीला १०,०००/- रुपयांची लाच मागितली. तडजोडीनंतर ही रक्कम ८,०००/- रुपये निश्चित करण्यात आली.

तक्रारदाराने या घटनेची माहिती लाचलुचपत प्रतिबंधक विभाग यांच्याकडे दिली. विभागाच्या अधिकाऱ्यांनी पडताळणी केली असता, आरोपीने लाचेची मागणी केल्याचे स्पष्ट झाले. त्यानुसार, दिनांक ०७/१०/२०२५ रोजी लाचलुचपत प्रतिबंधक विभागाने सापळा रचला. या सापळ्यात आरोपी पोलीस उपनिरीक्षक वसंत राऊत यास पंचासमक्ष तक्रारदाराकडून ८,०००/- रुपयांची लाच स्वीकारताना रंगेहाथ पकडण्यात आले. लाचेची रक्कम स्वीकारल्याचे पंचासमक्ष सिद्ध झाले आहे.

याप्रकरणी आरोपीविरुद्ध मुकुंदवाडी पोलीस स्टेशन येथे भ्रष्टाचार प्रतिबंधक अधिनियम-१९८८ नुसार गुन्हा दाखल करण्यात आला असून, पुढील तपास सुरू आहे. सदरची कारवाई पोलीस निरीक्षक योगेश शिंदे आणि त्यांच्या पथकाने यशस्वीरित्या पूर्ण केली.