अहिल्यानगर – स्थानिक गुन्हे शाखेचे (L.C.B.) पोलीस निरीक्षक किरणकुमार कबाडी यांच्या मार्गदर्शनाखालील पथकाने लोणी पोलीस ठाण्याच्या हद्दीत गोवंश कारवाई केली. या कारवाईत सुमारे साडेबारा लाख रुपयांचा मुद्देमाल हस्तगत करण्यात आला आहे.
पोलीस अधीक्षक सोमनाथ घार्गे यांच्या आदेशानुसार स्थानिक गुन्हे शाखेने जिल्ह्यात अवैध कत्तलखाने आणि गोवंशीय जनावरांची कत्तल करणाऱ्यांवर माहिती काढून कारवाई करण्यासाठी विशेष मोहीम हाती घेतली आहे. पोलीस निरीक्षक किरणकुमार कबाडी यांच्या मार्गदर्शनाखाली पोलीस उपनिरीक्षक समीर अभंग आणि दिपक मेढे यांच्यासह पोलीस अंमलदार सुनिल पवार, संतो, खैरे, भिमराज खर्से, रिचर्ड गायकवाड, राहुल डोके, बाळासाहेब नागरगोजे, प्रमोद जाधव, महिला पोलीस अंमलदार भाग्यश्री भिटे, ज्योती शिंदे, चंद्रकांत कुसळकर, आणि भगवान धुळे यांचे पथक तयार करण्यात आले होते.
या पथकाला जिल्ह्यातील गोवंशीय जनावरांची कत्तल करण्याचे ठिकाण आणि अवैध कत्तलखान्यांची माहिती काढून कारवाई करण्याच्या सूचना देण्यात आल्या होत्या. गुरुवारी (९ ऑक्टोंबर) पथक लोणी पोलीस ठाण्याच्या हद्दीत अवैध धंद्यांची माहिती काढत असताना त्यांना एक गुप्त माहिती मिळाली. मुश्ताक कुरेशी नावाचा इसम आणि त्याच्या साथीदारांनी गोवंशीय जनावरे कत्तल करण्याच्या उद्देशाने आणले असून त्यांची कत्तल केली जाणार असल्याची माहिती पथकाला मिळाली.
या माहितीच्या आधारे पथकाने त्वरीत ममदापूर येथे जाऊन खात्री केली असता, त्यांना काटवनामध्ये गोवंशीय जनावरे बांधलेली दिसली. तसेच, त्या ठिकाणी एका स्विफ्ट कारमध्ये (क्र. एम.एच. ०२ ए. पी.२९२१) काही इसम गोमांस भरताना दिसले. या आरोपींना पथकाची चाहूल लागली आणि ते सर्वजण तात्काळ तेथून पळून गेले. पळून गेलेल्या आरोपींबाबत तेथे उपस्थित असलेल्या लोकांकडे विचारपूस केली असता त्यांची नावे पथकाच्या चौकशीत निष्पन्न झाली.
पळून गेलेल्या आरोपींमध्ये मुश्ताक कुरेशी, आदिल कुरेशी, अब्दुल करिम कुरेशी, शाहिद युनुस कुरेशी, आणि साजीद युनुस कुरेशी (सर्व रा. ममदापूर ता. राहाता) यांचा समावेश आहे.
या कारवाईदरम्यान, पोलीसांनी घटनास्थळावरून ५,१०,०००/- रुपये किंमतीची १४ गोवंशीय जिवंत जनावरे, ५,००,०००/- रुपये किंमतीची स्विफ्ट कार (क्र. एम.एच. ०२ ए. पी.२९२१) आणि २,४०,००/- रुपये किंमतीचे अंदाजे ८०० किलो गोमांस असा एकूण १२,५०,००/- रुपये किमतीचा मुद्देमाल हस्तगत केला आहे.
पळून गेलेल्या पाच आरोपींविरुद्ध स्थानिक गुन्हे शाखेचे पोलीस कॉन्स्टेबल सुनिल रमेश मालणकर यांच्या फिर्यादीवरून लोणी पोलीस ठाणे येथे गु.र.नं. ५५०/२०२५ अन्वये भारतीय न्याय संहिता २०२३ चे कलम २७१, ३२५, ३ (५), तसेच महाराष्ट्र प्राणी संरक्षण अधिनियम क. ५, ५ (अ), ५ (व), ५ (क), ९, ९ (व) आणि प्राण्यांना निर्दयतेने वागविणेचे कलम ३ व ११ प्रमाणे गुन्हा दाखल करण्यात आला आहे. पुढील तपास पोलीस करत आहे.
अवैध कत्तलखान्यांवर पोलीस अधीक्षकांचे धडक अभियान; ५ आरोपींवर गुन्हा दाखल, लाखोंचा मुद्देमाल जप्त
पळून गेलेल्या आरोपींमध्ये मुश्ताक कुरेशी, आदिल कुरेशी, अब्दुल करिम कुरेशी, शाहिद युनुस कुरेशी, आणि साजीद युनुस कुरेशी (सर्व रा. ममदापूर ता. राहाता) यांचा समावेश आहे.
