लाचखोरीच्या प्रकरणात पोलिसालाच अटक

महाराष्ट्र संवाद न्यूज ऑनलाईन- 

अल्पवयीन मुलीवर झालेल्या अत्याचार प्रकरणात पोक्सो कायद्याअंतर्गत गुन्हा दाखल न करण्यासाठी पाच लाख रुपयांची लाच मागणाऱ्या एका पोलिसाला रायगडच्या लाचलुचपत प्रतिबंधक विभागाने (ACB) रंगेहाथ पकडले आहे. 

विशाल वाघाटे असे अटक करण्यात आलेल्या पोलीस कर्मचाऱ्याचे नाव आहे.

३० वर्षीय तक्रारदाराविरोधात पॉक्सो कायद्यांतर्गत गुन्हा दाखल होण्याची तक्रार प्राप्त झाली होती. या गुन्ह्यात योग्य ती मदत करण्यासाठी तसेच पॉक्सो कायद्याअंतर्गत गुन्हा दाखल न करण्यासाठी पोलीस कर्मचारी विशाल वाघाटे याने तक्रारदाराकडे पाच लाख रुपयांच्या लाचेची मागणी केली होती.

याबाबतची तक्रार लाचलुचपत प्रतिबंधक विभागाकडे ८ ऑक्टोबर रोजी प्राप्त झाली. ९ ऑक्टोबरला या तक्रारीची पडताळणी करण्यात आली, यात आरोपी पोलीस वाघाटे यांनी लाचेची मागणी केल्याचे आणि पहिल्या हप्त्यात तीन लाख रुपये स्वीकारण्याचे कबूल केल्याचे सिद्ध झाले.

त्यानुसार, लाचलुचपत प्रतिबंधक विभागाने सापळा रचला आणि काल सकाळी (१० ऑक्टोबर) वाघाटे यांना तक्रारदाराकडून ३ लाख रुपयांची लाच घेताना रंगेहाथ पकडले. महाड शहर पोलीस ठाण्यात आरोपीविरोधात भ्रष्टाचार प्रतिबंधक कायद्यांतर्गत गुन्हा दाखल करण्यात आल्याची माहिती रायगडच्या लाचलुचपत विभागाच्या प्रमुख पोलीस उपअधीक्षक सरिता भोसले यांनी दिली.

पोलीस उपअधीक्षक सरिता भोसले यांच्या नेतृत्वाखालील या कारवाईत पोलीस निरीक्षक निशांत धनवडे, नारायण सरोदे, सहाय्यक फौजदार विनोद जाधव, अरुण करकरे, सुषमा राऊळ, पोलीस हवालदार महेश पाटील, सुमित पाटील, परम ठाकूर, सिचन आटपाडकर, पोलीस शिपाई मोनाली पाटील, अनंत घरत, सागर पाटील यांनी महत्त्वाची भूमिका बजावली.