संगमनेर – तालुक्यातून जाणाऱ्या पुणे-नाशिक राष्ट्रीय महामार्गावर अपघातांची मालिका सुरूच असल्याचे पुन्हा एकदा पाहायला मिळाले. शनिवारी (दि. ११ ऑक्टोंबर) सकाळी दहा वाजेच्या सुमारास आनंदवाडी शिवारात भरधाव चारचाकी वाहनाने रस्त्याच्या कडेला उभ्या असलेल्या दुचाकीला जोरदार धडक दिली. या भीषण अपघातात दुचाकीस्वार जागीच ठार झाला.
याबाबत डोळासणे महामार्ग पोलीस मदत केंद्राकडून मिळालेल्या माहितीनुसार, सचिन बबन इघे (वय ३१, रा. खडकवाडी, ता. पारनेर) हे त्यांची दुचाकी रस्त्याच्या कडेला उभी करून लघुशंकेसाठी थांबले होते. त्याच वेळी दत्तात्रेय देवराम गाडगे (वय ४९, रा. लोणी, ता. राहाता) याने रस्त्याच्या परिस्थितीकडे दुर्लक्ष करून आणि हयगयीने चारचाकी वाहन चालवून उभ्या दुचाकीला जोराची धडक दिली. धडकेमुळे दुचाकीस्वार सचिन इघे यांना गंभीर दुखापत होऊन ते जागीच ठार झाले.
अपघाताची माहिती मिळताच डोळासणे महामार्ग पोलीस मदत केंद्राचे सहायक पोलीस निरीक्षक रावसाहेब बांबळे यांच्यासह पथकाने तात्काळ घटनास्थळी धाव घेतली. स्थानिक नागरिकांच्या मदतीने गंभीर जखमी इघे यांना रुग्णवाहिकेतून संगमनेरमधील खाजगी रुग्णालयात हलवण्यात आले, परंतु डॉक्टरांनी त्यांना तपासून मृत घोषित केले.
या अपघातामुळे महामार्गावर काही काळ वाहतूक खोळंबली होती. पोलिसांनी अपघातग्रस्त वाहन क्रेनच्या मदतीने बाजूला करून वाहतूक सुरळीत केली. याप्रकरणी गुन्हा दाखल करण्याचे काम सुरू होते. पुणे-नाशिक महामार्गावरील या सततच्या अपघातांमुळे या मार्गावर प्रवास करणाऱ्यांमध्ये चिंतेचे वातावरण निर्माण झाले आहे.
Post Views: 1,544
