मानवतेचा झरा… घाबरू नकोस! जखमी प्रगतीला थोरातांनी दिला आधार; बिबट्यांना रोखण्यासाठी तातडीच्या उपाययोजनांची मागणी

संगमनेर – इयत्ता नववी मध्ये शिकणाऱ्या व डिग्रस येथे बिबट्याच्या हल्ल्यात गंभीर जखमी झालेल्या प्रगती सखाराम श्रीराम हिची शनिवारी रात्री राज्याचे माजी मंत्री, लोकनेते बाळासाहेब थोरात यांनी हॉस्पिटलमध्ये जाऊन भेट घेत तिची आपुलकीने चौकशी केली. यावेळी त्यांनी बिबट्यांच्या वाढत्या हल्ल्यांवर तीव्र चिंता व्यक्त केली आणि वन विभागाने तातडीने प्रभावी उपाययोजना करण्याची गरज असल्याचे सांगितले.

डिग्रस येथील सहकारमहर्षी भाऊसाहेब थोरात विद्यालयात शिकणारी प्रगती शनिवारी सकाळी शाळेत जात असताना दबा धरून बसलेल्या बिबट्याने तिच्यावर अचानक हल्ला केला. या हल्ल्यात प्रगतीच्या मानेला मोठ्या जखमा झाल्या असून ती गंभीर जखमी झाली. तिच्यावर सध्या संगमनेरमधील खासगी रुग्णालयात उपचार सुरू आहेत.

शाळेत जाणाऱ्या विद्यार्थिनीवर बिबट्याने केलेल्या हल्ल्याच्या वेळी तिच्या पाठोपाठ येत असलेले प्रगतीचे मामा देवराम खेमनर यांनी दाखवलेल्या धाडसामुळे तिचा जीव वाचला. खेमनर यांनी क्षणाचाही विलंब न करता थेट मोटरसायकल शेतात घालून हॉर्न वाजवला आणि मोठा आरडाओरडा केला. त्यामुळे बिबट्याने प्रगतीला सोडून पळ काढला. या घटनेमुळे डिग्रस व परिसरात भीतीचे वातावरण निर्माण झाले आहे.

या घटनेची माहिती मिळताच दौऱ्यावर असलेले लोकनेते बाळासाहेब थोरात यांनी शहरात येताच तातडीने हॉस्पिटलमध्ये जाऊन प्रगतीच्या तब्येतीची चौकशी केली. त्यांनी प्रगतीशी संवाद साधून तिला खंबीर राहण्याचा सल्ला दिला. तसेच, प्रगतीचे मामा देवराम खेमनर यांनी प्रसंगावधान राखून दाखवलेल्या धाडसाचेही त्यांनी विशेष कौतुक केले. यावेळी त्यांनी प्रगतीच्या पालकांशी आणि मामा खेमनर यांच्याशीही संवाद साधून घटनेची माहिती घेत सविस्तर चर्चा केली.

या प्रसंगी बोलताना बाळासाहेब थोरात म्हणाले, “सध्या बिबट्यांचे मानवी वस्तीत वाढते हल्ले अत्यंत चिंताजनक आहेत. बिबटे मानवी वस्तीत शिरत असून वन विभागाने यावर अत्यंत प्रभावी उपाययोजना करणे गरजेचे आहे.” याबाबत आपण वनमंत्र्यांशी बोलणार असून बिबट्यांचा बंदोबस्त करण्यासाठी तातडीने पाऊले उचलण्यास सांगणार आहे.

बाळासाहेब थोरात यांच्या या संवेदनशील भेटीबद्दल आणि त्यांनी दाखवलेल्या आपुलकीबद्दल उपस्थित ग्रामस्थ व पालकांनी कृतज्ञता व्यक्त केली.