आधी वाढदिवसाचे सेलिब्रेशन मग प्रियकराकडून प्रेयसीचा केकच्या चाकूने गळा चिरून खून! हृदयद्रावक घटना; दुसऱ्या प्रियकराच्या संशयावरून हत्याकांड

महाराष्ट्र संवाद न्यूज ऑनलाईन –

पुण्याजवळील पिंपरी-चिंचवड शहरातून प्रेमसंबंधातील त्रिकोणातून घडलेली एक अत्यंत हादरवून टाकणारी आणि क्रूर घटना समोर आली आहे. प्रेमसंबंधातून निर्माण झालेल्या संशयाने आणि संतापाने एका प्रियकराने आपल्याच प्रेयसीचा निघृण खून केला आहे. वाढदिवस एकत्र साजरा केल्यानंतर प्रियकराने केक कापण्यासाठी वापरलेल्या चाकूने प्रेयसीचा गळा चिरल्याची ही धक्कादायक घटना वाकड पोलिस ठाण्याच्या हद्दीत घडली आहे.

या घटनेत मेरी मल्लेश तेलगू या तरुणीचा खून झाला असून, तिच्या प्रियकर दिलावर सिंग (वय २५) याला वाकड पोलिसांनी अटक केली आहे.

पोलिसांनी दिलेल्या माहितीनुसार, आरोपी दिलावर सिंग आणि मृत मेरी मल्लेश तेलगू हे दोघे २०१७ पासून प्रेमसंबंधात होते. मात्र, गेल्या काही दिवसांपासून मेरीचे दुसऱ्या एका व्यक्तीसोबत प्रेमसंबंध असल्याचा संशय दिलावरला होता, यावरून त्यांच्यात सतत वाद होत होते. मेरीने आपल्या दुसऱ्या प्रियकराशी लग्न करण्याचा निर्णय घेतल्याचे समजताच दिलावरचा संताप वाढला आणि त्याने खुनाचा कट रचला.

घटनेच्या दिवशी दिलावरने मेरीला पिंपरी-चिंचवडमधील काळाखडक परिसरातील एका लॉजवर बोलावले. तिथे दोघांनी एकत्र केक कापून मेरीचा वाढदिवस साजरा केला. वाढदिवसाचे सेलिब्रेशन संपताच दिलावरने मेरीचा मोबाईल तपासला. मोबाईलमध्ये मेरी आणि तिच्या कथित दुसऱ्या प्रियकराचे काही आक्षेपार्ह फोटो त्याला दिसले.

मोबाईलमधील फोटो पाहताच दिलावरचा संताप अनावर झाला. त्याने क्षणाचाही विलंब न करता, केक कापण्यासाठी वापरलेला चाकू उचलला आणि मेरीवर सपासप वार केले. हे वार इतके गंभीर होते की, यात मेरीचा जागीच मृत्यू झाला. ज्या हातात केक कापला, त्याच हाताने आणि त्याच चाकूने प्रियकराने आपल्या प्रेयसीचा जीव घेतल्याने या घटनेवर अधिकच क्रूरतेची किनार चढली आहे.

प्रेयसीची हत्या केल्यानंतर दिलावर सिंग याने स्वतःहून जवळच्या कोंढवा पोलिस ठाण्यात हजर होऊन ‘मी माझ्या प्रेयसीची हत्या केली आहे,’ असे सांगून गुन्ह्याची कबुली दिली. कोंढवा पोलिसांनी तातडीने या घटनेची माहिती वाकड पोलिसांना दिली. त्यानुसार, वाकड पोलिसांनी तातडीने तपास सुरू करून आरोपीला अटक केली आहे. या घटनेमुळे परिसरात हळहळ व्यक्त होत आहे.