ठाकरे सेनेच्या नव्या जिल्हा कार्यकारिणीने शिवसैनिकात उत्साह, स्थानिक स्वराज्य संस्थेच्या निवडणुकीत ताकद दाखवून देऊ : नवनियुक्त जिल्हाप्रमुख सचिन कोते

संगमनेर – आगामी होऊ घातलेल्या नगरपालिका व जिल्हा परिषद पंचायत समितीच्या निवडणुकीत सच्चा शिवसैनिकांचा सन्मान करत उमेदवारी दिली जाणार आहे. विरोधकांना या निवडणुकीत उद्धव ठाकरेंच्या शिवसेनेचे ताकद दाखवून दिली जाईल. महाविकास आघाडी म्हणून निवडणूक लढवली जाणार असली तरी आघाडी झाली नाही तर सर्वत्र संपूर्ण ताकतीने उमेदवार दिले जाणार असून त्यांच्या विजयासाठी पराकाष्टा केली जाईल, असे प्रतिपादन शिवसेनेचे नवनिर्वाचित जिल्हाप्रमुख सचिन होते यांनी केले.

स्थानिक स्वराज्य संस्थांच्या निवडणुकीच्या पार्श्वभूमीवर शिवसेनेने (उद्धव बाळासाहेब ठाकरे) मावळते जिल्हाप्रमुख रावसाहेब खेवरे यांना पक्षाने पदावरून हटविल्यानंतर शिवसेनेच्या उत्तर नगर जिल्हा प्रमुखपदी सचिन कोते आणि जगदीश चौधरी यांची पक्षाने नियुक्ती केली आहे. नवनियुक्त दोन्ही जिल्हा प्रमुखांनी मंगळवारी संध्याकाळी संगमनेरला भेट देत येथील कार्याचा निवडणुकीसंदर्भात आढावा घेतला.

यावेळी माजी शहर प्रमुख अमर कतारी यांच्या पुढाकारातून या दोन्ही जिल्हाप्रमुखांचा सत्कार करण्यात आला. जुन्यांना हटवून नव्या जिल्हाप्रमुखांना पक्षाने नियुक्त्या दिल्याने जुनी मरगळ झटकून ठाकरेंचे शिवसैनिक आता रणांगणात उतरल्याचे दिसत आहे. 

शासकीय विश्रामगृहात झालेल्या या बैठकीत उत्तरेमध्ये झालेल्या संघटनात्मक बदलांचे स्वागत करण्यात आले. तसेच तालुक्यातील अनेक निष्ठावंत शिवसैनिक युवा सैनिक व महिलांमध्ये उत्साहाचे वातावरण निर्माण झाले आहे. 

जिल्हाप्रमुख जगदीश चौधरी उपस्थितांना मार्गदर्शन करताना म्हणाले, येत्या निवडणुकीत आपले उमेदवार निवडून आले पाहिजे यासाठी तयारीला लागा. आगामी निवडणुकीच्या पार्श्वभूमीवर पक्षाची भूमिका ठामपणे महायुतीच्या विरोधात राहणार असून निवडणूक महाविकास आघाडी म्हणून एकत्रित लढवायची की स्वतंत्र याबाबतचा निर्णय पक्षीय पातळीवर होईल. या निर्णयाप्रमाणे आपण सर्व काम करू.

अमर कतारी म्हणाले, ज्या-ज्या ठिकाणी आपली ताकद आहे त्या-त्या ठिकाणी महाविकास आघाडीचे नेते उद्धव ठाकरे शरद पवार व बाळासाहेब थोरात यांच्या माध्यमातून शिवसैनिकांना न्याय मिळवून देण्याचा प्रयत्न केला जाईल. यावेळी श्रीरामपूर येथील अशोक थोरे, कोपरगाव येथील भरत मोरे यांनी देखील मार्गदर्शन केले. असलमभाई शेख, पैलवान गगन हाडा, शुभम वाघ आदी यावेळी उपस्थित होते.

युवा सेनेचे जिल्हाप्रमुख अमित चव्हाण, गोविंद नागरे, योगेश खेमनर, वैभव अभंग, अमोल डुकरे, सचिन साळवे, रवींद्र कानकाटे यांनी उपस्थितांचे स्वागत केले. प्रास्ताविक दीपक साळुंके यांनी केले तर असिफ तांबोळी यांनी आभार मानले. यावेळी शिवसेनेचे पदाधिकारी व शिवसैनिक मोठ्या संख्येने उपस्थित होते.