अहिल्यानगर – श्रीगोंदा तालुक्यातून एका सतरा वर्षांच्या अल्पवयीन मुलीचे अपहरण करणाऱ्या आरोपीला अहिल्यानगर स्थानिक गुन्हे शाखेने गुजरात राज्यातून अटक केली आहे. या कारवाईमुळे अपहृत मुलीची सुटका झाली असून, तिच्या कुटुंबीयांना दिलासा मिळाला आहे.
श्रीगोंदा तालुक्यातून अल्पवयीन मुलगी बेपत्ता झाल्याप्रकरणी बेलवंडी पोलीस ठाण्यात गु.र.नं. २४७/२०२५ भारतीय न्याय संहिता २०२३ च्या कलम १३७(२) नुसार गुन्हा दाखल करण्यात आला होता. मुलगी मिळून येत नसल्याने तिच्या नातेवाईकांनी पोलीस अधीक्षक कार्यालयासमोर उपोषण सुरू केले होते.
या गंभीर घटनेची दखल घेत पोलीस अधीक्षक सोमनाथ घार्गे साहेब यांनी उपोषणकर्त्यांना मुलीचा तात्काळ शोध घेण्याचे आश्वासन दिले आणि स्थानिक गुन्हे शाखेला तातडीने आरोपीला ताब्यात घेऊन मुलीचा शोध घेण्याचे आदेश दिले.
पोलीस निरीक्षक किरणकुमार कबाडी यांच्या नेतृत्वाखाली स्थानिक गुन्हे शाखेचे पोलीस उपनिरीक्षक दीपक मेढे, पोलीस अंमलदार राहुल द्वारके, रिचर्ड गायकवाड, सोमनाथ झांबरे, महिला पोलीस अंमलदार सोनाली भागवत यांचे एक पथक तयार करण्यात आले. पथकाने तांत्रिक माहिती आणि व्यावसायिक कौशल्याचा उपयोग करून आरोपी आणि अपहृत मुलगी गुजरात राज्यात पळून गेल्याची माहिती मिळवली.
पथकाने त्वरित सुरत, गुजरात येथे धाव घेतली आणि आरोपी निलेश उर्फ सोन्या अशोक सावंत (वय २९ वर्षे, रा. चिंभळी, ता. श्रीगोंदा, जि. अहिल्यानगर) याला तसेच अपहृत अल्पवयीन मुलीला सुरत येथून ताब्यात घेतले.
ताब्यात घेण्यात आलेल्या आरोपीला व अल्पवयीन मुलीला पुढील तपासाकरिता बेलवंडी पोलीस ठाण्यात हजर करण्यात आले आहे. बेलवंडी पोलीस ठाणे या गुन्ह्याचा पुढील तपास करत आहेत. पोलीस अधीक्षक श्री. सोमनाथ घार्गे साहेब यांच्या सूचना व मार्गदर्शनाखाली स्थानिक गुन्हे शाखेच्या पथकाने ही यशस्वी कारवाई केली.
‘ऑपरेशन गुजरात’ यशस्वी! अहिल्यानगर स्थानिक गुन्हे शाखेने अल्पवयीन मुलीचे अपहरण करणाऱ्या आरोपीला बेड्या ठोकल्या
पथकाने त्वरित सुरत, गुजरात येथे धाव घेतली आणि आरोपी निलेश उर्फ सोन्या अशोक सावंत (वय २९ वर्षे, रा. चिंभळी, ता. श्रीगोंदा, जि. अहिल्यानगर) याला तसेच अपहृत अल्पवयीन मुलीला सुरत येथून ताब्यात घेतले.
