महसूल विभागातील ४७ अधिकाऱ्यांची पदोन्नती; महाराष्ट्राला मिळाले ४७ नवे अपर जिल्हाधिकारी!

मुंबई – महाराष्ट्र शासनाच्या महसूल विभागाने दिवाळीच्या पार्श्वभूमीवर अधिकाऱ्यांसाठी मोठी भेट जाहीर केली आहे. विभागाने तब्बल ४७ उपजिल्हाधिकारी संवर्गातील अधिकाऱ्यांना अपर जिल्हाधिकारी (निवडश्रेणी) या पदांवर पदोन्नती दिली आहे. 

या निर्णयामुळे महाराष्ट्राला ४७ नवे अपर जिल्हाधिकारी मिळाले आहेत. महसूल मंत्री चंद्रशेखर बावनकुळे यांनी व्हिडिओ कॉन्फरन्सिंगद्वारे महसूल अधिकाऱ्यांशी संवाद साधून ही आनंदाची बातमी दिली.

गेल्या अनेक वर्षांपासून महसूल विभागातील अधिकाऱ्यांच्या पदोन्नत्या प्रलंबित होत्या, यामुळे प्रशासकीय कामांवर परिणाम होत होता. महसूल विभागाने यंदा दिवाळीपूर्वीच ही पदोन्नती देऊन अधिकाऱ्यांमध्ये उत्साहाचे वातावरण निर्माण केले आहे. प्रशासकीय कारभारात सुधारणा करण्याच्या दृष्टीने हा निर्णय महत्त्वपूर्ण मानला जात आहे.

या शासन आदेशानुसार, पदोन्नत झालेल्या अधिकाऱ्यांनी ३० दिवसांच्या आत नवीन पदावर रुजू होणे बंधनकारक आहे. अन्यथा, त्यांच्यावर शिस्तभंग विषयक कारवाई केली जाईल, असे स्पष्ट करण्यात आले आहे. या पदोन्नतीमुळे महसूल विभागाची कार्यक्षमता वाढण्यास आणि जनतेच्या अपेक्षा पूर्ण करणाऱ्या या विभागाला अधिक गती मिळण्यास मदत होईल.