संगमनेर – दूध उत्पादकांच्या जीवनात दुग्ध व्यवसायाच्या माध्यमातून आर्थिक स्थिरता निर्माण झाल्यामुळे सहकाराच्या माध्यमातून ग्रामीण अर्थव्यवस्था मजबूत झाली आहे. ग्रामीण भागात दुग्धव्यवसाय हा मुख्य व्यवसाय बनला आहे, असे प्रतिपादन संगमनेर दूध संघाचे चेअरमन रणजितसिंह देशमुख यांनी केले.
दिवाळी सणाच्या पार्श्वभूमीवर दूध उत्पादकांना मोठी आर्थिक मदत देण्यात आली आहे. दूध संघाच्या माध्यमातून दिपावलीनिमित्त दूध दर फरक, दुधाचे पेमेंट, अनामत, कामगारांना बोनस व मेहनताना, व्यापारी देणे, चढ-उतार निधी असे एकूण दूध उत्पादकांना ४१ कोटी रूपये त्याचबरोबर दूध संघाशी संलग्न असणाऱ्या सहकारी दूध संस्थांनी सुध्दा ४१ कोटी रूपये असे एकूण ८२ कोटी रूपये दूध उत्पादकांना अदा करण्यात आले असल्याची माहिती देशमुख यांनी दिली.
देशमुख पुढे म्हणाले की, थोर स्वातंत्र्य सेनानी सहकारमहर्षी भाऊसाहेब थोरात यांनी सन १९७७ साली दूध संघाची स्थापना केली. त्यांच्या आदर्श विचारांवर दूध संघाची यशस्वी वाटचाल चालू आहे. माजी मंत्री बाळासाहेब थोरात यांच्या नेतृत्व व मार्गदर्शनाखाली दूध उत्पादकांच्या हिताची सातत्यपूर्ण काळजी घेतली जात असून दूध उत्पादकांच्या जीवनात आनंद निर्माण करण्याचे काम केले जात आहे. त्याचबरोबर नवनवीन तंत्रज्ञानाचा वापर करून दुग्धव्यवसायाला फायदेशीर ठरतील असेच निर्णय घेतले जातात.
संगमनेर दूध संघाची वार्षिक उलाढाल ५५० कोटी असून, दूध उत्पादकांना वर्षभरामध्ये ४७५ कोटी रूपये दूध खरेदीपोटी दिले जातात. दुग्धव्यवसायाच्या माध्यमातून नियमितपणे १५ दिवसाला पेमेंट होत असल्याने दूध उत्पादकांचे अर्थकारण व्यवस्थित चालू असते. दिवाळीनिमित्त येणाऱ्या मोठ्या रक्कमेमुळे मोठ्या प्रमाणावर उलाढाल होत असते. ग्रामीण भागातील या अर्थकारणावरच शहराची अर्थव्यवस्था अवलंबून आहे.
दूध उत्पादकांकडील रक्कम ही शहरातील व्यापाऱ्यांकडे विविध प्रकारच्या खरेदीच्या माध्यमातून हस्तांतरीत होत असते. त्यामुळे संपुर्ण तालुक्याचीच अर्थव्यवस्था मजबूत झाली आहे. तालुक्यातील सहकारी संस्थांमुळे संगमनेरची बाजारपेठ ही जिल्ह्यात सर्वात मोठी बाजारपेठ बनलेली आहे, असे त्यांनी स्पष्ट केले.
देशमुख यांनी यावेळी आवाहन केले की, सहकारी चळवळ अधिक मजबूत करावयाची असल्यास दूध उत्पादकांनी सहकारी संघाला ताजे, स्वच्छ व निर्भेळ दुधाचा पुरवठा करावा व ग्राहकांनी देखील सहकारी दूध संघांने निर्माण केलेले दर्जेदार व शुध्द ‘राजहंस’ दुग्धजन्य पदार्थ खरेदी करावे.
याप्रसंगी दूध संघाचे व्हा. चेअरमन राजेंद्र पाटील चकोर, संचालक लक्ष्मणराव कुटे, विलासराव वर्पे, भास्करराव सिनारे, संतोष मांडेकर, विलास कवडे, बबनराव कुऱ्हाडे, बादशहा वाळुंज, संजय पोकळे, विक्रम थोरात, रमेश गुंजाळ, विष्णू ढोले, तुकाराम दातीर, रविंद्र रोहम, भारत मुंगसे, प्रमोद पावसे, प्रतिभाताई जोंधळे, मंदाताई नवले, तसेच कार्यकारी संचालक डॉ. सुजित खिलारी आदी मान्यवर उपस्थित होते.
रणजितसिंह देशमुख यांचा विश्वास: संगमनेर तालुक्याच्या अर्थकारणाची गुरुकिल्ली ‘दूध व्यवसाय’; ८२ कोटींचे वितरण
थोर स्वातंत्र्य सेनानी सहकारमहर्षी भाऊसाहेब थोरात यांनी सन १९७७ साली दूध संघाची स्थापना केली. त्यांच्या आदर्श विचारांवर दूध संघाची यशस्वी वाटचाल चालू आहे.
