सणासुदीच्या काळात राजकीय पोळी भाजण्यासाठी जातीय तेढ निर्माण करू नका; गोरगरीब व्यापाऱ्यांचे मोठे नुकसान होत आहे: अमर कतारी

संगमनेर – दिवाळीच्या तोंडावर संगमनेर बाजारपेठेत काही राजकीय कार्यकर्त्यांकडून सर्वसामान्य किरकोळ दुकानदारांच्या दुकानांवर भगवे झेंडे लावण्याचा प्रयत्न करण्यात आला. या कृतीवर शिवसेना (उद्धव बाळासाहेब ठाकरे) तालुका प्रमुख अमर कतारी यांनी तीव्र आक्षेप नोंदवला असून, राजकीय पोळी भाजण्यासाठी गोरगरीब व्यापाऱ्यांचे नुकसान करू नका, असे आवाहन केले आहे.

भगवा झेंडा आपल्या प्रत्येकाच्या घरावर असावा याला आपला निश्चितच विरोध नाही. परंतु, काही राजकीय मंडळी स्वतःला ‘कडवट’ हिंदुत्ववादी दाखवण्यासाठी किंवा आपली राजकीय पोळी भाजण्यासाठी हिंदू-मुस्लिम वादाला जन्म देत आहेत. छोट्या व्यावसायिकाला कोणत्याही पक्षाशी किंवा राजकारणाशी देणेघेणे नसते, तो फक्त आपल्या व्यवसायाची वाट पाहत असतो.

जर आज हिंदू लोकांनी ‘जात बघून’ खरेदीचा विचार केला, तर मुस्लीम बांधवही ईद किंवा अन्य सणांच्या वेळेस तोच विचार करतील. यामुळे ९९% असलेले हिंदू कापड आणि किराणा दुकानदार तसेच छोट्या व्यावसायिकांवर उपासमारीची वेळ येईल. तुम्ही राजकारण जरूर करा, पण गोरगरीबांच्या पोटावर मारू नका आणि कोणाच्या व्यवसायावर जाऊ नका, अशी विनंती कतारी यांनी अशा हिंदुत्ववादी कार्यकर्त्यांना केली आहे.