संगमनेरात थेट पोलीस ठाण्यात घुसून गोंधळ, पोलीस अंमलदाराला शिवीगाळ; १२ जणांविरुद्ध गुन्हा दाखल

संगमनेर: पोलीस ठाण्यातच बेकायदेशीर जमाव जमवून गोंधळ घालणे, पोलीस अंमलदाराच्या शासकीय कामात अडथळा निर्माण करणे आणि त्यांना अश्लील शिवीगाळ करणे, या गंभीर आरोपांखाली संगमनेर शहर पोलिसांनी मोठी कारवाई केली आहे. याप्रकरणी सहा निष्पन्न आरोपींसह एकूण १२ अनोळखी व्यक्तींविरुद्ध गुन्हा दाखल करण्यात आला आहे.

पोलीस हेड कॉन्स्टेबल योगेश लक्ष्मण हासे यांनी दिलेल्या तक्रारीनुसार संगमनेर शहर पोलीस ठाण्यात ही कारवाई करण्यात आली आहे. गुन्हा दाखल झालेल्या सहा आरोपींमध्ये सागर बागे, सुरज बागे, ऋषी आव्हाड, सागर पगारे, मनोज पगारे आणि सनी धारणकर यांचा समावेश आहे. या सहा आरोपींव्यतिरिक्त अन्य ०६ अनोळखी व्यक्तींवरही गुन्हा नोंदवण्यात आला आहे.

बुधवारी (२२ ऑक्टोबर) रात्री ८.०० वाजेपासून ते गुरुवारी (२३ ऑक्टोबर) रोजी सकाळी ८.०० वाजेपर्यंतच्या दरम्यान संगमनेर शहर पोलीस ठाण्यात ही घटना घडली. फिर्यादी योगेश हासे हे त्यांच्या केबिनमध्ये शासकीय काम करत असताना, आरोपींनी बेकायदेशीररित्या जमाव जमवून थेट पोलीस ठाणे अंमलदार यांच्या केबिनमध्ये प्रवेश केला.

केबिनमध्ये प्रवेश केल्यानंतर आरोपींनी मोठ-मोठ्याने आरडाओरडा करून गोंधळ घालण्यास सुरुवात केली. फिर्यादी हासे यांनी त्यांना समजावून सांगण्याचा प्रयत्न केला. मात्र, आरोपींनी त्यांचे काहीही न ऐकता दंगा सुरूच ठेवला. या गोंधळात आरोपींनी तक्रारदार योगेश हासे यांना बसण्यासाठी असलेली खुर्ची ढकलून दिली आणि त्यांना अश्लील शिवीगाळ केली. आरोपींच्या या कृत्यांमुळे योगेश हासे यांच्या शासकीय कामात गंभीर अडथळा निर्माण झाला.

पो.हे.कॉ. योगेश लक्ष्मण हासे यांच्या तक्रारीवरून, संगमनेर शहर पोलीस ठाण्यात गु.र.नं. ९४४/२०२५ अन्वये आरोपींविरुद्ध ‘भारतीय न्याय संहिता’ (BNS) च्या कलम २२१, ३५२, ३५१(२), १८९(१), १८९(२), १९४(२), २९६ तसेच महाराष्ट्र पोलीस अधिनियम कलम ११२ आणि ११७ प्रमाणे गुन्हा दाखल करण्यात आला आहे. या घटनेचा पुढील तपास शहर पोलीस करत आहेत.