‘फिटनेस हीच खरी फॅशन!’ – संगमनेर ‘श्री’ शरीरसौष्ठव स्पर्धा 16 नोव्हेंबरला; ‘आय लव्ह संगमनेर’चा पुढाकार! युवक-युवतींना हक्काचे व्यासपीठ

संगमनेर – संगमनेरच्या विकासासाठी सामाजिक क्षेत्रात कार्यरत असलेल्या ‘आय लव्ह संगमनेर’ या संस्थेच्या माध्यमातून दि. १६ नोव्हेंबर रोजी संगमनेर ‘श्री’ म्हणजेच शरीरसौष्ठव (बॉडी बिल्डिंग) स्पर्धेचे आयोजन करण्यात आले आहे. शहरातील युवक-युवतींना फिटनेस, स्नायूंचा विकास आणि शरीरसौष्ठव प्रदर्शन करण्याची संधी देण्यासाठी ही स्पर्धा आयोजित केली जात आहे.

या स्पर्धेचे आयोजन संगमनेर शहरातील मालपाणी लॉन्स येथे होणार आहे. स्पर्धेत पुरुष आणि महिला Classic, Physique व Fitness अशा विविध विभागांमध्ये सहभागी होऊ शकतील. इच्छुक स्पर्धकांनी ‘ilovesangamner.org’ या संकेतस्थळावर जाऊन लवकरच नोंदणी करावी आणि आपला सहभाग सुनिश्चित करावा, अशी माहिती प्रकल्प प्रमुख नचिकेत खोले यांनी दिली.

यावेळी बोलतांना खोले म्हणाले की, आमदार सत्यजीत तांबे हे कार्यशील राजकीय नेते आहेत. युवकांमध्ये प्रेरणा निर्माण करणे, त्यांच्यासाठी ठामपणे भूमिका मांडणे, विकासवादी विचार आणि स्वतंत्र प्रवास ही त्यांची ओळख आहे. तरुणाईच्या ऊर्जेतून जनतेची सेवा करणारे सत्यजीत तांबे हे वेळोवेळी युवकांच्या सर्वांगीण विकासासाठी ठाम भूमिका मांडतात. त्यांच्या संकल्पनेतून साकारलेले ‘आय लव्ह संगमनेर’ हे सामाजिक क्षेत्रात उत्तमपणे कार्यरत आहे.

या स्पर्धेत सहभागी स्पर्धक आपल्या स्नायूंच्या आकार, संतुलन आणि पोझेस सादर करतील. तज्ज्ञ जजेसमार्फत योग्य मूल्यांकन केले जाईल आणि विजेत्यांसाठी ट्रॉफी, मेडल्स व रोख बक्षिसे प्रदान केली जातील. शहरातील फिटनेसप्रेमी आणि नागरिकांसाठी ही स्पर्धा निश्चितच उत्साही आणि प्रेरणादायी ठरणार आहे.

---

फिटनेस हीच खरी फॅशन! – समाजातील युवकांनी खऱ्या अर्थानं नशा मुक्तीकडे गेलं पाहिजे. नशा मुक्तीसाठी आपण ही बॉडी बिल्डिंग स्पर्धा आयोजित करत आहोत. जेणेकरून युवक नशेकडे न जाता आपल्या आरोग्याकडे लक्ष देतील, त्याची काळजी घेतील हेच माझं ध्येय आहे. तरुण चांगल्या मार्गाला लागतील, हीच माझी अपेक्षा आहे. – आमदार सत्यजीत तांबे