संगमनेरात कत्तलखान्यावर छापा तीन लाख रुपयांचे गोमांस पोलिसांनी घेतले ताब्यात

संगमनेर – संगमनेर शहर पोलिसांच्या नाकासमोर सुरू असलेल्या बेकायदेशीर कत्तलखान्यावर पोलीस उपअधीक्षकांच्या पथकाने मंगळवारी पहाटेच्या वेळी छापेमारी केली आहे. शहरातील मदिना नगरमध्ये करण्यात आलेल्या या कारवाईत तीन लाख रुपये किमतीचे तब्बल दीड हजार किलो गोमांस पोलिसांनी हस्तगत केले आहे.

संगमनेर मधील कत्तलखाने बंद असल्याचे भासविले जात असले तरी ते सुरूच आहे. पोलीस उपअधीक्षक डॉ. कुणाल सोनवणे यांना मंगळवारी पहाटे ०३.१० वाजण्याच्या सुमारास गोपनीय माहिती मिळाली की, संगमनेर शहरातील मदिनानगर या ठिकाणी सालीम साटम कुरेशी आणि गुलाम फरीद साबिर कुरेशी (दोघे रा. बुध्दविहार शेजारी, संगमनेर) हे पत्र्याच्या शेडमध्ये गोवंश कत्तल करत आहेत.

मिळालेल्या माहितीच्या आधारे, उपाधीक्षक कुणाल सोनवणे यांनी आपल्या पथकातील पोलीस हेड कॉन्स्टेबल अनिल रघुनाथ कडलग, पोलीस नाईक पांडुरंग विष्णु पटेकर, पोलीस कॉन्स्टेबल राहुल कैलास सारबंदे यांना कारवाईचे आदेश देत खात्री करण्यासाठी पाठवले. पथकाने संगमनेर शहर पोलीस स्टेशनच्या स्टाफला मदतीसाठी सोबत घेऊन ०३.५० वाजता नमूद ठिकाणी छापा टाकला.

दरम्यान पोलिसांची चाहुल लागताच घटनास्थळी उपस्थित असलेले दोन इसम पळून गेले. पळून गेलेले इसम हे सालीम साटम कुरेशी आणि गुलाम फरीद साबीर कुरेशी असल्याची खात्री झाली. या कारवाईमध्ये गोवंश जातीचे कत्तल केलेले सुमारे तीन लाख रुपये किमतीचे अंदाजे १५०० किलो गोमांस जप्त केले.

याप्रकरणी संगमनेर शहर पोलीस ठाण्यात गु.र.नं. ९५७/२०२५ अन्वये भारतीय न्याय संहीता २०२३ चे कलम २७१, ३२५, ३ (५) आणि महाराष्ट्र पशु संरक्षण अधिनियम १९९५ सुधारीत २०१५ चे कलम ५, ५ (क), ९, ९ (अ) नुसार गुन्हा दाखल करण्यात आला आहे.