संगमनेर नगरपालिका मतदार यादीची सुनावणी संपली, ३१ ऑक्टोबरला अंतिम यादी

संगमनेर – संगमनेर नगरपालिका निवडणुकीसाठी सर्व १५ प्रभागांतील मतदार यादीवर घेतलेल्या हरकतींवर मंगळवारी (दि. २८) प्रांताधिकारी अरुण उंडे यांच्यासमोर सुनावणी पूर्ण झाली. विशेष म्हणजे, या सुनावणीसाठी एक हजार नागरिकांना नोटीस बजावूनही केवळ १०० नागरिकच उपस्थित होते. आता अंतिम मतदार यादी शुक्रवारी (दि. ३१) प्रसिद्ध होणार आहे.

संगमनेर नगरपालिकेने मतदार यादी प्रसिद्ध करताच अनेक नागरिकांनी यावर हरकती घेतल्या होत्या. दुसऱ्या प्रभागात नावे, एकाच कुटुंबातील नावे वेगळ्या प्रभागात तर अनेकांनी स्वतः दुसऱ्या प्रभागात नावे समाविष्ट केल्याने यावर इच्छुक नगरसेवक आणि राजकीय पक्षाच्या कार्यकर्त्यांनी हरकती घेतल्या होत्या. स्वतः मतदारांनी आणि इच्छुक नगरसेवकांनी मिळून एकूण १७३० हरकती घेतल्या होत्या.

या हरकती ‘अ’ (मतदारांनी स्वतः नोंदवलेल्या) आणि ‘ब’ (इच्छुक नगरसेवक व कार्यकर्त्यांनी नोंदवलेल्या) अशा दोन गटांत विभागल्या होत्या. पालिकेच्या अधिकारी-कर्मचाऱ्यांनी अनेक हरकतींवर तत्काळ काम करून अडचणी सोडवल्यामुळे, सुनावणीसाठी केवळ एक हजार हरकती शिल्लक राहिल्या होत्या.

प्रांताधिकारी अरुण उंडे यांच्यासमोर प्रांत कार्यालयात मंगळवारी दुपारी (दि. २८) या एक हजार हरकतींवर सुनावणी झाली. यावेळी पालिकेच्या प्रभारी मुख्याधिकारी धनश्री पवार उपस्थित होत्या. एक हजार नागरिकांना नोटीस बजावूनही सुनावणीसाठी शंभरच्या आसपास नागरिकच उपस्थित राहिले. सुनावणीची ही प्रक्रिया पूर्ण झाल्याने आता संगमनेर नगरपालिकेची अंतिम मतदार यादी शुक्रवार, दि. ३१ ऑक्टोबर रोजी प्रसिद्ध केली जाईल.