‘माणुसकी जिंकली!’ राहुल गांधी समर्थक संघ (RGSS) धावले मदतीला; जळालेल्या सायकलऐवजी नवी सायकल देऊन दळे कुटुंबाला मोठा आधार! माणुसकीच्या दर्शनाने कुटुंबाचे डोळे पाणावले!

संगमनेर – गेल्या आठवड्यात (२४ ऑक्टोंबर) रोजी संगमनेर तालुक्यातील रायते गावातील दळे कुटुंबावर मोठे संकट कोसळले. त्यांच्या दोन मोटरसायकल आणि शाळेत जाणाऱ्या मुलाची एक सायकल अज्ञाताने जाळून टाकली. वाहनांचे झालेले मोठे नुकसान आणि मुलाच्या सायकलमुळे शाळेत जाण्यासाठी होणारी गैरसोय यामुळे दळे कुटुंब दुःखाच्या गर्तेत होते. या कुटुंबाच्या विशेषत: शाळेत जाणाऱ्या विद्यार्थ्याच्या मदतीला राहुल गांधी समर्थक संघ (RGSS) धावला. क्रॉस व्हील सायकलचे संचालक राहुल वर्पे यांनी ना नफा ना तोटा या तत्त्वावर RGSS ला सायकल उपलब्ध करून देत ही सायकल विद्यार्थ्याला भेट देण्यात आली.

गेल्या आठवड्यात घडलेल्या या घटनेचा अद्याप तपास लागलेला नाही. या पार्श्वभूमीवर घटनेनंतर अनेक राजकीय नेत्यांनी या कुटुंबाची धावती भेट घेतली खरी, पण दुर्दैवाने त्यांना कोणीही कोणतीही ठोस मदत मिळवून दिली नाही, यामुळे कुटुंबाची निराशा वाढली होती.

मदतीसाठी धावले ‘राहुल गांधी समर्थक संघ’ (RGSS) – दळे कुटुंबाच्या या संकटाची माहिती राहुल गांधी समर्थक संघ (RGSS) संगमनेर यांच्या टीमला मिळाली. दळे यांचा मुलगा रायते येथून संगमनेर शहरातील सह्याद्री शाळेत शिकण्यासाठी सायकलवर येत असल्याची व या प्रकारामुळे त्याची मोठी गैरसोय झाल्याची बाब लक्षात येताच, RGSS च्या सदस्यांनी लगेचच त्या कुटुंबाशी संपर्क साधला आणि त्यांच्या मदतीसाठी पुढाकार घेतला. बुधवारी (दिनांक २९ ऑक्टोंबर) सायंकाळी RGSS च्या टीमने दळे कुटुंबाला एक नवीन सायकल भेट म्हणून दिली. ही सायकल खास करून त्यांच्या मुलाला शाळेत जाण्यासाठी देण्यात आली आहे.

आनंदाश्रू आणि कृतज्ञता – RGSS च्या सदस्यांकडून मिळालेली ही अनपेक्षित मदत पाहून दळे कुटुंबाचे डोळे पाणावले. त्यांच्या चेहऱ्यावर आनंदाश्रू तरळले आणि समाजात खरोखर अजूनही माणुसकी जिवंत आहे, या भावनेने त्यांना खूप मोठा दिलासा मिळाला. दळे परिवाराने राहुल गांधी समर्थक संघ (RGSS) च्या संपूर्ण ग्रुपचे मनापासून कौतुक केले आणि आभार मानले.

हे कार्य करणारे हात – RGSS संगमनेरचे हे सामाजिक कार्य यशस्वी करण्यासाठी अमोल शेलकर, शिवश्री राम अरगडे, प्रकाश कडलग, सतीश खताळ, मोहसीन रशीद शेख, सुभाष महाराज कोकणे, मोहसीन खलील शेख, अक्षय मोहिते, शंतनू भालेकर, रवींद्र हासे, अनिल राऊत, भरत कळसकर, अरुण गावित्रे आदींनी सहकार्य केले. RGSS ने केलेल्या या मानवतावादी कार्यामुळे दळे कुटुंबाला मोठा आधार मिळाला आहे आणि समाजासमोर एक चांगला आदर्श निर्माण झाला आहे.