संगमनेर – शिवसेना (उद्धव बाळासाहेब ठाकरे) पक्षांतर्गत झालेल्या संघटनात्मक फेरबदलांनंतर संगमनेर तालुक्यात प्रथमच आयोजित करण्यात आलेल्या आढावा बैठकीत व इच्छुक उमेदवारांच्या मुलाखतीदरम्यान, नवनिर्वाचित जिल्हाप्रमुख सचिन कोते पाटील यांनी शिवसैनिकांना आगामी स्थानिक स्वराज्य संस्था निवडणुकांसाठी नव्या जोमाने आणि संपूर्ण ताकदीनिशी कामाला लागण्याचे निर्देश दिले.
बुधवारी (२९ ऑक्टोबर) संगमनेर येथील शासकीय विश्रामगृहात झालेल्या या महत्त्वपूर्ण बैठकीत बोलताना जिल्हाप्रमुख कोते पाटील यांनी स्पष्ट केले की, शिवसैनिकांनी संपूर्ण तयारीने निवडणुकांसाठी सज्ज राहावे, आणि यावेळी पक्षाकडून संबंधित उमेदवारांना पूर्ण ताकद मिळवून देण्याचे वचन त्यांनी शिवसैनिकांना दिले.
संगमनेर तालुक्यात सध्या शिंदे गटाचे आमदार असल्याने, आगामी निवडणुका वर्चस्वाच्या आणि अत्यंत चुरशीच्या होणार आहेत. या पार्श्वभूमीवर, पक्षप्रमुख उद्धव ठाकरेंनी आदेश दिल्यास महाविकास आघाडी म्हणून निवडणूक लढवण्याची आमची मानसिक तयारी असून, वेळ आल्यास नगराध्यक्ष पदाच्या उमेदवारीसह स्वतंत्र निवडणूक लढवण्याची तयारीही आम्ही केली असल्याचे कोते पाटील यांनी उपस्थित शिवसैनिकांना सांगितले.
निष्ठावान शिवसैनिकांना संधी द्या – अमर कतारी
या बैठकीदरम्यान, तालुकाप्रमुख अमर कतारी यांनी पक्षाला नख लावणाऱ्यांना त्यांची खरी जागा दाखवून देण्यासाठी शिवसैनिक सज्ज असल्याचे सांगितले. साम, दाम, दंड, भेद नीती वापरून शिवसैनिक आपले काम पूर्ण करतील. तसेच, निष्ठावान शिवसैनिकांना संधी देण्याबाबतचा आग्रह त्यांनी जिल्हाप्रमुख व उपस्थित पदाधिकाऱ्यांकडे केला. पक्षश्रेष्ठींचा आदेश झाल्यास एकदिलाने महाविकास आघाडी म्हणून लढण्यासही शिवसैनिक सज्ज असल्याचे कतारी यांनी नमूद केले.
यावेळी सह संपर्कप्रमुख ॲड. दिलीप साळगट यांनी शिवसैनिकांना मार्गदर्शन केले. उपजिल्हाप्रमुख अशोक सातपुते यांनी आपले मनोगत व्यक्त केले. शहरप्रमुख आसिफ तांबोळी यांनी उपस्थितांचे आभार मानले.
या बैठकीस प्रभारी तालुकाप्रमुख भाऊसाहेब हासे, शहरप्रमुख पप्पू कानकाटे, शहरप्रमुख वैभव अभंग, युवा सेना जिल्हाप्रमुख अमित चव्हाण, महिला शहर प्रमुख संगीता गायकवाड, महिला आघाडी तालुकाप्रमुख शितल हासे, आशा केदारी, वैशाली वडतले, कृषी उत्पन्न बाजार समिती संचालक विजय सातपुते, सदाशिव हासे, तालुका संघटक बाळासाहेब कवडे, राजू सातपुते, युवा सेना जिल्हा समन्वयक फैसल सय्यद, वाहतूक सेना शहरप्रमुख इम्तियाज शेख, उपतालुकाप्रमुख अशोक बडे, प्रभाकर गेठे, भीमा पावसे, अमोल डुकरे, अक्षय गाडे, योगेश बिचकर, युवा सेना तालुकाप्रमुख अक्षय गुंजाळ, शोएब शेख, प्रकाश गायकवाड, सचिन साळवे, अभि साबळे, मुस्लिम मावळा अजीज मोमीन, प्रकाश चोथवे, रहीम बेग, कैफ शेख, बाळू घोडके, योगेश बिचकर, दीपक साळुंके, संतोष कुटे, इरफान शेख, दानिश खान, रवी गिरी, ब्रह्मा खिडके यांच्यासह अनेक शिवसैनिक व इच्छुक उमेदवार उपस्थित होते.
