पुणे – पुणे लाचलुचपत प्रतिबंधक विभागाने (ACB) पिंपरी-चिंचवड पोलीस आयुक्तालयातील आर्थिक गुन्हे शाखेत मोठी धडक कारवाई करत पोलीस उपनिरीक्षक प्रमोद चिंतामणी (वय ३५) याला तब्बल ४६ लाख ५० हजार रुपयांची लाच स्वीकारताना रंगेहात पकडले आहे. या कारवाईमुळे पुणे शहर आणि पिंपरी-चिंचवड पोलीस दलात मोठी खळबळ उडाली आहे.
एसीबीच्या माहितीनुसार, आरोपी उपनिरीक्षकाने तक्रारदाराच्या आशिलाला गुन्हेगारी प्रकरणात मदत करण्यासाठी आणि त्याच्या वडिलांचा जामीन मिळवून देण्यासाठी तब्बल २ कोटी रुपयांची लाच मागितली होती. या प्रकरणात तक्रारदाराचे वडील एका गुन्ह्यात अटकेत होते आणि प्रमोद चिंतामणी या प्रकरणाचा तपास अधिकारी होता. त्याने या लाचेच्या रकमेतील १ कोटी रुपये स्वतःसाठी आणि उर्वरित १ कोटी रुपये वरिष्ठ पोलीस निरीक्षकांना देणार असल्याचे त्याने प्राथमिक पडताळणीमध्ये (२७ ऑक्टोबर) स्पष्ट झाले होते.
तक्रारदाराने एसीबीकडे धाव घेतल्यानंतर विभागाने सापळा रचला. रविवारी (२ नोव्हेंबर) तक्रारदाराकडून ठरलेल्या ५० लाख रुपयांच्या पहिल्या हप्त्यातील ४६.५० लाखांची रोख रक्कम स्वीकारताना चिंतामणीला पुणे शहरातील पेठ रस्त्यावरील उंटाड्या मारुती मंदिरासमोर रंगेहात पकडण्यात आले. या प्रकरणी पुणे शहरातील समर्थ पोलीस ठाण्यात त्याच्याविरुद्ध भ्रष्टाचार प्रतिबंधक अधिनियम, १९८८ अंतर्गत गुन्हा दाखल करण्यात आला आहे.
लाचेची रक्कम जप्त करतानाच, एसीबीने आरोपी उपनिरीक्षकाची कसून झडती घेतली. या झडतीमध्ये ४५ लाख ५० हजार रुपये रोख रक्कम, सॅमसंग फोल्ड आणि ॲपल आयफोन असे दोन महागडे मोबाईल फोन, तसेच ३६०० रुपये अतिरिक्त रोख आणि शासकीय ओळखपत्र जप्त करण्यात आले आहे. एसीबीकडून सध्या या प्रकरणाचा सखोल तपास सुरू असून, या लाचखोरीमध्ये कोणत्याही वरिष्ठ पोलीस अधिकाऱ्याचा सहभाग आहे का, याचाही कसून शोध घेतला जात आहे.
एसीबीचा ‘मेगा’ ॲक्शन प्लॅन: ४६.५० लाखांची लाच घेणारा P.S.I. रंगेहात पकडला! उपनिरीक्षक २ कोटींची लाच मागत होता; वरिष्ठ अधिकाऱ्यांचा सहभागही तपासणार
एसीबीकडून सध्या या प्रकरणाचा सखोल तपास सुरू असून, या लाचखोरीमध्ये कोणत्याही वरिष्ठ पोलीस अधिकाऱ्याचा सहभाग आहे का, याचाही कसून शोध घेतला जात आहे.
