डॉ. संपदा मुंडे प्रकरणी रुपाली चाकणकरांविरोधात आज मुंबईत ‘निषेध मोर्चा’; उत्कर्षा रूपवते यांची प्रमुख उपस्थिती

मुंबई: फलटण येथील डॉ. संपदा मुंडे यांच्या संशयास्पद मृत्यू प्रकरणात राज्य महिला आयोगाच्या अध्यक्षा रुपाली चाकणकर यांनी केलेल्या कथित असंवेदनशील, स्त्रीविरोधी आणि अन्यायकारक विधानाच्या विरोधात वंचित बहुजन आघाडी आक्रमक झाली आहे. 

या विधानाचा तीव्र निषेध करण्यासाठी वंचित बहुजन आघाडीच्या वतीने मुंबईत आज गुरुवारी (6 नोव्हेंबर) दुपारी 12 वाजता मंत्रालयासमोर, राष्ट्रवादी काँग्रेस (अजित पवार गट) कार्यालयाच्या बाजूला असणाऱ्या A-4, राजगड, मॅडम कामा रोड या ठिकाणी निषेध मोर्चा आयोजित करण्यात आला आहे.

या निषेध मोर्च्याला वंचित बहुजन आघाडीच्या राज्य प्रवक्ता आणि राज्य महिला आयोगाच्या माजी सदस्य असलेल्या उत्कर्षा रूपवते यांची प्रमुख उपस्थिती असणार आहे. एका पीडित महिलेच्या प्रकरणात रुपाली चाकणकर यांनी केलेल्या विधानामुळे पीडितेला न्याय मिळण्याऐवजी तिचे चारित्र्यहनन करण्याचा प्रयत्न झाला, जो अत्यंत असंवेदनशील आणि महिलांच्या न्यायप्रक्रियेला बाधा आणणारा आहे, असा आरोप आंदोलकांनी केला आहे.

मोर्चेकरी चाकणकर यांच्या विधानाचा तीव्र निषेध करत असून, त्यांनी आपल्या वक्तव्याबद्दल माफी मागावी आणि नैतिक जबाबदारी स्वीकारून राजीनामा द्यावा, अशी मागणी करण्याची शक्यता आहे. तसेच, डॉ. संपदा मुंडे यांच्या प्रकरणाची निष्पक्षपणे एसआयटी चौकशी व्हावी, या मागणीसाठीही यावेळी जोर दिला जाणार आहे. या निषेध मोर्च्यात वंचित बहुजन आघाडीचे पदाधिकारी, महिला आघाडीचे कार्यकर्ते आणि विविध सामाजिक संघटनांचे प्रतिनिधी मोठ्या संख्येने सहभागी होऊन आपल्या भावना व्यक्त करणार आहेत. 

रुपाली चाकणकर यांच्या कार्यालयासमोर मोर्चा आयोजित केल्याने, या विषयावरून आता राजकीय वातावरण अधिक तापण्याची चिन्हे आहेत.