नशेसाठीच्या इंजेक्शन (ड्रग्स) संदर्भात सखोल चौकशीची नव्या पोलीस निरीक्षकांकडे राहुल गांधी समर्थक संघाची (RGSS) मागणी

संगमनेर – शांत आणि सुसंस्कृत म्हणून ओळखले जाणारे संगमनेर शहर आता ड्रग्स माफीयांच्या रडारवर आले असून शहरात नशेच्या इंजेक्शनचे सर्रासपणे बेकायदा विक्री होत असल्याचे पोलिसांनी समोर आणल्याने शहरात ड्रग्सचा शिरकाव झाल्याचे समोर आले आहे. या पार्श्वभूमीवर राहुल गांधी समर्थक संघाने (RGSS) नव्या पोलीस निरीक्षकांची नुकतीच भेट घेत त्यांचे स्वागत करत ही मागणी केली आहे.

संगमनेर शहर पोलीस ठाण्याचे तत्कालीन पोलीस निरीक्षक रवींद्र देशमुख यांची भेट घेत आर जी एस एस च्या पदाधिकाऱ्यांनी या प्रकरणाच्या चौकशीची मागणी केली होती मात्र देशमुख यांची बदली झाली. त्यामुळे त्यांच्या जागी आलेले नवे पोलीस निरीक्षक समीर बारवकर यांनी या प्रकरणी लक्ष घालत सखोल तपास करण्याची मागणी संघाच्या पदाधिकाऱ्यांनी पुन्हा एकदा बारवकर यांची भेट घेत केली आहे. संघाच्या वतीने नव्या पोलीस निरीक्षकांना निवेदन देण्यात आले आहे. 

निवेदनात या देशविघातक कृत्याचे समूळ उच्चाटन करण्यासाठी आणि या रॅकेटच्या मुळापर्यंत पोहोचण्यासाठी त्यांनी सध्या सुरू असलेल्या तपासात आणखी सखोल चौकशी करण्याची मागणी केली आहे. संगमनेर शहरात ‘एम.आर. व्हिटॅमिन सप्लिमेंट शॉप’ नावाच्या दुकानावर पोलिसांनी छापा टाकून डॉक्टरांच्या चिठ्ठीशिवाय नशेसाठी वापरली जाणारी औषधे (मेफेनटर्माइन सल्फेट इंजेक्शन्स) विकणाऱ्या आदित्य किशोर गुप्ता याला अटक केली आहे. पोलिसांनी या कारवाईत २.२३ लाखांचा मुद्देमाल जप्त केला आहे. गुन्हा दाखल होऊ नये यासाठी पोलीस यंत्रणेवर आलेला राजकीय दबाव या पार्श्वभूमीवर आरोपीचे राजकीय कनेक्शन समोर आल्याने रात्री उशिराने पोलिसांनी धाडस दाखवत गुन्हा दाखल केला याबद्दल RGSS ने पोलिसांचे कौतुक केले आहे.

त्यानंतर, त्यांनी या प्रकरणाच्या तपासाला अधिक गती मिळावी, यासाठी त्यांनी तपासाच्या महत्त्वाच्या अनेक पैलूंवर प्रकाश टाकला आहे. निवेदनाच्या माध्यमातून राहुल गांधी समर्थक संघाने (RGSS) पोलिसांना विचारणा केली की, सध्या चालू असलेल्या तपासात आरोपीसह आत्तापर्यंत किती लोकांना अटक करण्यात आली आहे आणि अटक केलेल्या आरोपींकडून नेमकी काय माहिती मिळाली आहे? या ड्रग्सचा मूळ स्रोत कोणता आहे, याचा तपास पोलिसांनी करावा. तसेच, आरोपी व्यक्तीच्या विरोधात यापूर्वी इतर गुन्हेगारी फिर्यादी आहेत का, आणि या ड्रग्सचा पुरवठा इतर व्यक्तींपर्यंत किंवा शहरांपर्यंत आहे का, याची सखोल चौकशी व्हावी.

या गुन्ह्यासाठी इंजेक्शन देण्यासाठी वापरलेली सामग्री कोठून आणि कशी मिळाली, आरोपीची पोलिस कोठडी किती दिवसांसाठी घेण्यात आली आहे? तसेच, ड्रग्सच्या नमुन्यांची शासकीय रासायनिक संशोधनाकडे पाठवणी करण्यात आली आहे का, आणि त्याचा अहवाल कधीपर्यंत अपेक्षित आहे? आदी प्रश्न उपस्थित केले. 

गुन्ह्याचा तपास आधुनिक पद्धतीने व्हावा यासाठी, आरोपी व्यक्तीच्या मोबाइल फोनच्या कॉल डिटेल्स, बँक व्यवहार, सोशल मीडिया अकाउंट्स इत्यादींची तपासणी करण्यात आली आहे का, यावरही त्यांनी लक्ष वेधले आहे. शेवटी, या गुन्ह्याशी संबंधित असलेल्या इतर संशयित व्यक्तींच्या शोधात तपास चालू आहे का, असाही प्रश्न त्यांनी उपस्थित केला आहे. 

या गंभीर प्रकरणाचा पाठपुरावा करण्यासाठी राहुल गांधी समर्थक संघाचे (RGSS) पदाधिकारी एकत्र आले असून, निवेदनावर सही करणाऱ्यांमध्ये बाळासाहेब घोडके, कल्याण जोर्वेकर, राम अरगडे, मोहसीन रशीद शेख, शंतनू भालेकर, प्रकाश कडलग, सतीश खताळ, अमोल शेलकर, प्रदीप धाडीवाल, अरुण गावित्रे, रवींद्र हासे, अनिल राऊत, सोमनाथ हासे, अक्षय मोहिते, प्रणव नवले, गणेश जगताप, राहुल वर्पे, शशी माघाडे, ॲड. अमित सोनवणे, किशोर खताळ, सुभाष कोकणे, बाळासाहेब जाधव आणि मोहसीन खलील शेख यांचा समावेश आहे.