पालिका निवडणुकीसाठी उमेदवारी अर्ज दाखल करण्याकरिता उरले काही तास, रविवारी सुट्टीच्या दिवशी 13 उमेदवारांचे अर्ज दाखल; अर्ज भरण्याची मुदत संपेपर्यंत महायुती-महाविकास आघाडीचे पत्ते गुलदस्त्यात!

संगमनेर: संगमनेर नगरपरिषद निवडणुकीचे चित्र आता अधिक स्पष्ट होण्याच्या दिशेने वाटचाल करत आहे. नगराध्यक्ष आणि नगरसेवक पदांसाठी अर्ज दाखल करण्याची प्रक्रिया अंतिम टप्प्यात पोहोचली असून, अर्ज भरण्याची अंतिम मुदत सोमवारी (दुपारी तीन वाजेपर्यंत) असल्याने आता अवघे काही तास उरले आहेत.

सहाय्यक निवडणूक निर्णय अधिकारी तथा मुख्याधिकारी दयानंद गोरे यांनी दिलेल्या माहितीनुसार, शनिवारपर्यंत नगराध्यक्ष पदासाठी एक आणि नगरसेवक पदासाठी सात अर्ज दाखल झाले होते. महत्त्वाचे म्हणजे, रविवार सुट्टीचा दिवस असूनही उमेदवारी अर्ज दाखल करण्याची प्रक्रिया सुरू होती, आणि या दिवशी १३ इच्छुकांनी आपले अर्ज दाखल केले. यामुळे आतापर्यंत नगराध्यक्ष पदासाठी एक तर नगरसेवक पदासाठी एकूण २० उमेदवारी अर्ज दाखल झाले आहेत.

महायुती आणि महाविकास आघाडीचे ‘वेट अँड वॉच’ – सर्वांत लक्षणीय बाब म्हणजे, अर्ज दाखल करण्याच्या अंतिम क्षणापर्यंत महाविकास आघाडी किंवा महायुती या दोन्ही प्रमुख पक्षांच्या कोणत्याही अधिकृत उमेदवारांनी आपले अर्ज दाखल केलेले नाहीत. दोन्ही पक्षांकडून आपली उमेदवारी कुणाला मिळणार, हे अद्याप गुलदस्त्यात आहे. दोन्ही आघाड्या एकमेकांच्या उमेदवारांचा अंदाज घेत असल्याने ‘वेट अँड वॉच’ची भूमिका घेतली जात आहे.

महाविकास आघाडी ‘शहर विकास’ किंवा अन्य आघाडीच्या नावाखाली निवडणूक लढवण्याची शक्यता असल्याने, महायुतीची रणनीती महाविकास आघाडीच्या उमेदवारांवर अवलंबून असल्याचे चित्र आहे. त्यामुळे महायुतीनेही अद्याप आपले उमेदवार जाहीर केलेले नाहीत. या दोन्ही आघाड्यांचे उमेदवार आता सोमवारी, अर्ज दाखल करण्याच्या शेवटच्या दिवशी, अंतिम क्षणी आपले अर्ज दाखल करण्याची चिन्हे आहेत.

जागा वाटपाचे संभावित चित्र (सूत्रांनुसार) – फाटाफूट टाळण्यासाठी आणि दक्षता म्हणून दोन्ही आघाड्यांकडून उमेदवारांची यादी अंतिम असूनही, ती जाहीर केली जात नाहीये. सूत्रांकडून मिळालेल्या माहितीनुसार महायुतीतील जागा वाटपाच्या संभाव्य सूत्रानुसार, नगराध्यक्षपद शिवसेनेला आपल्याकडे ठेवण्यात यश आले आहे. नगरसेवक जागांसाठी शहरातील जागा भारतीय जनता पक्ष तर उपनगरातील जागा शिवसेना लढवणार आहे. यासोबतच शहर आणि उपनगरात राष्ट्रवादीला प्रत्येकी एक जागा सोडली जाणार आहे. विशेषतः मुस्लिमबहुल प्रभागांमध्ये महायुती चिन्हावर निवडणूक न लढता अपक्ष उमेदवार देण्याची माहिती समोर येत आहे. तथापि, या माहितीला अद्याप अधिकृत दुजोरा मिळालेला नाही.

रविवारी दाखल झालेले १३ उमेदवारी अर्ज – दरम्यान, रविवारी दाखल झालेल्या १३ उमेदवारी अर्जांमध्ये खालील इच्छुकांचा समावेश आहे:

अश्विनी सतीश ढोले (प्रभाग १ अ), गोरे प्रसाद ज्ञानदेव (प्रभाग ७ ब), शेख असिफ इलियास (प्रभाग ८ ब), शेख सायरा इलियास कुरेशी (प्रभाग ९ ब), कुरेशी हुरबानो गुलामसाबीर, शेख फैरोजा इलियास आणि शेख दिलशाद अजीज (तिन्ही प्रभाग १० अ), इनामदार एजाज जमील (प्रभाग १० ब), कुरेशी रशिदाबी अब्दुल करीम (प्रभाग ११ अ), शेख शहबाज गफार (प्रभाग ११ ब), सौदागर इम्रान सत्तार व मोमिन जैद जुनेद (दोन्ही प्रभाग १५ अ) आणि शेख दिलशाद अजीज (प्रभाग १५ ब).