संगमनेर – शहरातील नामांकित संजीवन हॉस्पिटलचे संस्थापक आणि भाजपचे स्थानिक नेते डॉ. भानुदास डेरे यांनी कौटुंबिक वादातून अत्यंत धक्कादायक कृत्य केले आहे. मुलीने पत्नीला सपोर्ट केल्याचा राग मनात धरून डेरे यांनी आपल्या पी.ए. सोमनाथ पवार यांच्यासह थेट फाॅर्च्युनर गाडी हॉस्पिटलच्या वेटिंग रूममध्ये वेगाने घुसवली, काचेचा दरवाजा तोडला आणि एका कर्मचाऱ्याला चिरडून ठार मारण्याचा प्रयत्न केला. सुदैवाने तो तरुण बचावला. या घटनेने शहरात मोठी खळबळ उडाली असून, डॉ. डेरे यांच्याच कन्या डॉ. एकता वाबळे यांनी वडिलांविरोधात पोलीस ठाण्यात तक्रार दिल्यानंतर डॉ. डेरेना गंभीर कलमांखाली तात्काळ अटक करण्यात आली आहे.
ही धक्कादायक घटना मंगळवारी (१८ नोव्हेंबर) सायंकाळी ७:२० वाजण्याच्या सुमारास संगमनेर येथील गुंजाळवाडी परिसरातील संजीवन हॉस्पिटल अँड रिसर्च सेंटर येथे घडली.
सविस्तर माहितीनुसार, डॉ. भानुदास डेरे आणि त्यांची पत्नी विभक्त राहतात. त्यांची कन्या डॉ. एकता वाबळे या आईला सपोर्ट करतात, तसेच त्या हॉस्पिटलचे कामकाज पाहतात. याचा राग डॉ. डेरे यांच्या मनात होता. डेरे हे गेली अनेक वर्षे डॉ. वाबळे यांना धमक्या देऊन हॉस्पिटल खाली करण्यास भाग पाडत होते.
दि. १८ नोव्हेंबर रोजी सायंकाळी ७:२० च्या सुमारास डॉ. एकता वाबळे हॉस्पिटलच्या दुसऱ्या मजल्यावर काम करत असताना, अचानक काचा फुटल्याचा मोठा आवाज आला. हॉस्पिटल स्टाफने खाली धाव घेऊन डॉ. वाबळे यांना माहिती दिली. डॉ. वाबळे यांनी खाली येऊन पाहिलं असता, ग्राउंड फ्लोअरवरील वेटिंग रूममध्ये पांढऱ्या रंगाची एम. एच. १७ डी. जे. १४१९ क्रमांकाची फाॅर्च्युनर गाडी उभी होती. गाडीने वेटिंग रूमचा संपूर्ण काचेचा दरवाजा तोडला होता.
गाडीच्या ड्रायव्हिंग सीटवर आरोपी डॉ. भानुदास डेरे बसलेले होते आणि त्यांच्या शेजारी पी.ए. सोमनाथ पवार होता. डॉ. डेरे गाडीतून खाली उतरले आणि त्यांनी रिसेप्शन काउंटरवर लाथा मारून शिवीगाळ करण्यास सुरुवात केली. ते आय.सी.यू. कडे जाऊन आज एका-एकाला संपवतो असे ओरडू लागले. यावेळी पी.ए. सोमनाथ पवार त्यांना डॉक्टर साहेब, बिनधास्त राहा, गाडी पुढे घ्या आणि एका-एकाला संपवून टाका असे म्हणून प्रोत्साहन देत होता.
डॉ. एकता वाबळे यांनी आरडाओरडा केल्यानंतर स्टाफ जमा झाला. तेव्हा रिसेप्शनजवळ काम करणाऱ्या राजेंद्र अभंग (लॅब टेक्निशियन) या कर्मचाऱ्याने पुढे येऊन सांगितले की, मी काम करत असताना गाडी वेगाने माझ्या अंगावर घेऊन मला जीवे ठार मारण्याचा प्रयत्न केला.
कर्मचारी राजेंद्र अभंग यांना चिरडण्याचा प्रयत्न झाल्याचे समजताच डॉ. एकता वाबळे यांचा संताप अनावर झाला. वडिलांच्या राजकीय वलयाची पर्वा न करता त्यांनी तात्काळ पोलीस ठाण्यात जाऊन आरोपी डॉ. भानुदास गेणूजी डेरे (रा. घोडेकरमळा, ता. संगमनेर) आणि पी.ए. सोमनाथ पवार यांच्या विरोधात जीवे ठार मारण्याचा प्रयत्न केल्याची गंभीर तक्रार दाखल केली.
पोलिसांनी घटनेचे गांभीर्य लक्षात घेऊन आरोपींवर गंभीर कलमांन्वये गुन्हा दाखल करून त्यांना तात्काळ अटक केली आहे. एका नामांकित राजकीय नेत्याने केवळ कौटुंबिक वादातून असे विकृत आणि हिंसक कृत्य केल्याने सर्वत्र आश्चर्य व्यक्त होत असून, डेरे यांच्या कृतीची जोरदार चर्चा सुरू आहे. या घटनेचा पुढील तपास पोलीस करत आहेत.
