नगरपरिषद निवडणुकीच्या तोफा धडाडणार: गुरुवारी संगमनेरात एकनाथ शिंदे यांची सभा!

संगमनेर / प्रतिनिधी

संगमनेर नगरपरिषद निवडणुकीच्या पार्श्वभूमीवर महायुतीच्या प्रचाराला निर्णायक गती देण्यासाठी राज्याचे उपमुख्यमंत्री तथा शिवसेना (शिंदे गट) प्रमुख नेते एकनाथ शिंदे यांची जाहीर सभा आयोजित करण्यात आली आहे. 

त्यांच्यासोबतच जिल्ह्याचे जलसंपदा मंत्री तथा पालकमंत्री राधाकृष्ण विखे-पाटील हे देखील उपस्थित राहणार आहेत. ही सभा गुरुवारी (दिनांक २७ नोव्हेंबर) दुपारी ३ वाजता, नवीन नगर रोड येथे होणार असून याकडे संगमनेरकरांचे लक्ष लागले आहे.

नगरपरिषद निवडणुकीची रणधुमाळी चांगलीच रंगात आली आहे. आमदार अमोल खताळ, नगराध्यक्ष पदाच्या उमेदवार सुवर्णा संदीप खताळ आणि महायुतीचे सर्व प्रभागांतील उमेदवार नागरिकांपर्यंत पोहोचून विकासाभिमुख योजना आणि नगरपरिषदेचा आगामी रोडमॅप मांडत आहेत. प्रत्येक प्रभागात मोठे जनसंपर्क अभियान, पदयात्रा आणि विविध उपक्रमांमुळे निवडणुकीची उत्सुकता शिगेला पोहोचली आहे.

महायुतीचे कार्यकर्ते प्रचाराची दिशा, विकासाची भूमिका आणि शहराच्या भविष्यासाठी आखलेली रूपरेषा मतदारांपर्यंत पोहोचवण्यासाठी दिवस-रात्र मेहनत घेत आहेत. उपमुख्यमंत्री एकनाथ शिंदे आणि पालकमंत्री राधाकृष्ण विखे-पाटील यांच्या उपस्थितीत होणारी ही जाहीर सभा महायुतीच्या कार्यकर्त्यांसाठी ‘उर्जेचा नवा स्त्रोत’ ठरणार असल्याचा विश्वास व्यक्त करण्यात येत आहे. 

या सभेमुळे उमेदवारांना मोठा आत्मविश्वास मिळेल आणि प्रचाराला आणखी धार येईल, असा अंदाज वर्तवला जात आहे. सभेसाठी शिवसेना महायुतीकडून मोठ्या प्रमाणावर तयारी सुरू आहे. शिवसेना महायुतीतर्फे संगमनेरकरांनी मोठ्या संख्येने उपस्थित राहावे, असे आवाहन करण्यात आले आहे.