युवा नेतृत्वाचा ‘टेक-ऑफ’! आमदार सत्यजित तांबे यांचा ‘संगमनेर 2.0’ विकासाच्या नव्या अजेंड्यासह सज्ज! ‘प्रतिक्षा संपली! संगमनेर 2.0 जाहीर सभा!’ या समाज माध्यमातील व्हायरल पोस्टची रंगली चर्चा

महाराष्ट्र संवाद न्यूज ऑनलाईन | संगमनेर 

नाशिक पदवीधर मतदारसंघाचे आमदार सत्यजीत तांबे यांच्या ‘प्रतिक्षा संपली! संगमनेर 2.0 जाहीर सभा!’ या समाज माध्यमातील व्हायरल पोस्टमुळे संगमनेर नगरपालिकेच्या निवडणुकीचे वातावरण ढवळून निघाले आहे. तांबे यांची ही नवी पोस्ट काय आहे? याची संगमनेरकरांमध्ये आता उत्सुकता वाढली आहे. आमदार सत्यजित तांबे यांची पत्नी मैथिली तांबे स्थानिक विकास आघाडीकडून नगराध्यक्षपदाच्या रिंगणात असल्याने अपेक्षा वाढल्या आहे.

‘संगमनेर 2.0’ च्या माध्यमातून आमदार तांबे हे शहराच्या विकासाचा एक नवा अजेंडा नागरिकांसमोर मांडणार असल्याची चर्चा आहे. या सभेच्या घोषणेमुळे नगराध्यक्षपदाच्या या लढाईला एक वेगळी दिशा मिळण्याची शक्यता आहे. तांबे समर्थकांमध्ये ही निवडणूक केवळ उमेदवारांमधील नसून, संगमनेरला ‘मुक्त’ करण्याची लढाई असल्याची भावना जोर धरू लागली आहे.

सत्यजीत तांबे यांच्या या संकल्पनेतून शहरवासीयांना अनेक गोष्टींचे स्वातंत्र्य (मुक्ती) देण्याचे आश्वासन दिले जात आहे. यात प्रामुख्याने भ्रष्टाचारमुक्त प्रशासनाचे स्वातंत्र्य मिळवून देण्यासाठी कठोर उपाययोजना असतील. तसेच, विकासकामांना असलेली लाल फितीच्या कारभारातून मुक्ती देऊन, नागरिकांच्या गरजेनुसार आणि वेळेत कामे पूर्ण करण्याची गती आणली जाईल. 

सर्वात महत्त्वाचे म्हणजे, तांबे हे निर्णय प्रक्रियेतील नागरिकांचा सहभाग वाढवून, केवळ नेतेमंडळी नव्हे, तर प्रत्येक नागरिकाला शहर विकासाच्या निर्णय प्रक्रियेत हक्काचे स्वातंत्र्य देण्याचा मनोदय बाळगून आहेत. याशिवाय, पायाभूत सुविधांची हमी देत, पाणी, रस्ते, स्वच्छता यांसारख्या मूलभूत सुविधांसाठी नागरिकांना वारंवार झगडावे लागत असलेल्या त्रासातून मोकळीक मिळवून देण्याचे आश्वासनही या माध्यमातून दिले जात आहे.

या निवडणुकीतून तांबे गट युवा नेतृत्वाचा नवा अध्याय सुरू करू इच्छितो. हे नेतृत्व संगमनेरच्या राजकारणाला पारंपारिक वर्चस्वातून बाहेर काढत, अधिक गतिमान आणि आधुनिक चेहरा देण्याचा प्रयत्न करेल.

तांबे यांच्या पोस्टमध्ये ‘पुढील माहिती लवकरच…’ असे नमूद केल्याने, ही जाहीर सभा कधी, कोणाची आणि कुठे होणार, याकडे आता केवळ संगमनेरवासीयांचेच नव्हे, तर संपूर्ण राजकीय वर्तुळाचे लक्ष लागले आहे. या सभेच्या माध्यमातून तांबे नगराध्यक्षपदाच्या लढतीला निर्णायक कलाटणी देणार का, हे पाहणे महत्त्वाचे ठरणार आहे.