आमदार सत्यजित तांबे यांचा सत्ताधाऱ्यांवर प्रहार: ‘टायगर’ स्वार्थी तर ‘सिंह’ सर्वांना घेऊन येतो! उपमुख्यमंत्र्यांच्या ‘विकास’ दाव्यांचा केला पर्दाफाश

महाराष्ट्र संवाद न्यूज ऑनलाईन | संगमनेर 

गुरुवारच्या सभेत कोणीतरी ‘टायगर’ आला होता. टायगर हा स्वार्थी असल्याने एकटा येतो, तर जंगलचा राजा ‘सिंह’ (बाळासाहेब थोरात) सर्वांना बरोबर घेऊन येतो. राजकीय कार्यकर्त्याचे भाषण हे मुद्द्याचे असावे, करमणुकीचे नसावे, असा टोला नाव न घेता आमदार सत्यजित तांबे यांनी विरोधकांना लगावला.

उपमुख्यमंत्र्यांच्या दाव्याचे खंडन करत, सत्ताधाऱ्यांचे राजकारण केवळ ‘करमणुकीचे’ असल्याचे सांगत संगमनेर सेवा समितीच्या विराट सभेत आमदार सत्यजित तांबे यांनी आपल्या भाषणातून महायुतीवर जोरदार टीका केली. यावेळी त्यांनी सेवा समितीच्या माध्यमातून करण्यात येणाऱ्या कामांचा जाहीरनामा प्रसिद्ध केला.

उपमुख्यमंत्र्यांनी आरोग्यमंत्र्यांना फोन करून मंजूर केलेल्या कामाचा दाखला दिला, परंतु ते काम माजी महसूल मंत्री बाळासाहेब थोरात यांनी २८ जानेवारी २०२० रोजीच मंजूर करून ठेवले होते. तसेच, एमआयडीसीसाठी एप्रिल २०२५ मध्ये पत्र दिले, पण त्याचे उत्तर २६ नोव्हेंबर २०२५ रोजी मिळाले, असे सांगत त्यांनी उपमुख्यमंत्र्यांच्या दाव्याचे तारखांसहित खंडन केले.

उपमुख्यमंत्री एकनाथ शिंदे यांनी नाशिक-पुणे रेल्वेसाठी पंतप्रधान किंवा गृहमंत्र्यांकडे पाठपुरावा न करता ‘शेजारच्यांना समजून सांगावे’, असा उपरोधिक टोलादेखील आमदार तांबे यांनी लगावला.

तांबे म्हणाले, माजी मंत्री बाळासाहेब थोरात यांच्या मार्गदर्शनाखाली शहरात चांगले काम झाले, पण गेल्या वर्षभरात वातावरण बिघडले आहे. ‘संगमनेर 2.0’ हा जाहीरनामा राबवण्याचा आपला शब्द असून, निवडणुकीनंतर संगमनेरमध्ये एकही अनाधिकृत फ्लेक्स लागणार नाही आणि कोणताही कार्यक्रम रस्त्यावर होणार नाही. महाराजांचा अश्वारूढ पुतळा व आरक्षणाचा मुद्दा पुढील एका वर्षात मार्गी लावणार असल्याचे सांगत संगमनेरला 50 ते 150 टीडीएसचे शुद्ध पाणी मिळत आहे. पुढील काळामध्ये एकाच वेळेस पूर्ण दाबाने पाणी मिळेल. यासाठी काम केले जाणार असल्याचे त्यांनी सांगितले.

संगमनेरमधील नागरिकांनी एकत्र येऊन संगमनेर सेवा समिती स्थापन केली असून पुढील पाच वर्षात करावयाच्या कामांचा जाहीरनामा आमदार सत्यजित तांबे यांनी प्रसिद्ध केला. याचबरोबर हा जाहीरनामा राबवण्याचा आपला शब्द असून या कामासाठी कुठलाही निधी कमी पडणार नाही. कारण माजी मंत्री बाळासाहेब थोरात हे आपल्या पाठीशी आहेत त्यांचा शब्द हा प्रत्येक मंत्र्यासाठी अत्यंत आदराचा असल्याचे आमदार सत्यजित तांबे आणि सांगताच प्रचंड टाळ्यांचा कडकडाट झाला.

या सभेसाठी माजी आमदार डॉ. सुधीर तांबे, माजी नगराध्यक्ष दुर्गाताई तांबे, रणजीतसिंह देशमुख, विश्वास मुर्तडक, दिलीप पुंड, डॉ. जयश्री थोरात, सोमेश्वर दिवटे, नगराध्यक्ष पदाच्या उमेदवार डॉ. मैथिली तांबे, हिरालाल पगडाल, पप्पू कानकाटे, इसहाकखान पठाण, अजय फटांगरे, प्रमिला अभंग यांच्यासह सेवा समितीचे सर्व उमेदवार व पदाधिकारी उपस्थित होते. दुर्गाताई तांबे, दिलीपराव पुंड, इसाकखान पठाण आणि हिरालाल पगडाल यांचीही यावेळी भाषणे झाली.