संगमनेर-
संगमनेर शहर पोलिसांनी मध्यरात्री एका मोठ्या रॅकेटचा पर्दाफाश करत सुमारे आठ लाख रुपये किमतीचा ३२.८४५ किलोग्रॅम वजनाचा सुका गांजा जप्त केला आहे. या प्रकरणी चार आरोपींना पोलिसांनी तत्काळ अटक केली आहे. सातत्याने दोन दिवसात गांजा संदर्भात कारवाई झाल्याने शहरातील अवैध व्यवसायाचे मोठे नेटवर्क समोर येत आहे. या नेटवर्कच्या मुळापर्यंत जाण्याचे आव्हान संगमनेर पोलिसांसमोर उभे राहिले आहे. संगमनेर शहरात अवैध अंमली पदार्थांच्या तस्करीविरोधात स्थानिक पोलिसांनी केलेली ही महत्त्वाची आणि धडक कारवाई मानली जात आहे.
गुरुवारी नाशिकच्या नार्कोटिक विभागाच्या अधिकाऱ्यांनी शहरालगत असणाऱ्या सुकेवाडीमध्ये अशाच प्रकारे मध्यरात्रीपासून छापेमारी करत मोठी कारवाई केली होती. या कारवाईमध्ये सव्वा कोटी रुपयांचा ४५६ किलो गांजा जप्त केला होता, यामुळे स्थानिक पोलिसांच्या कार्यक्षमतेवर गंभीर प्रश्नचिन्ह उभे राहिले होते. या टीकेच्या पार्श्वभूमीवर, ही कारवाई शुक्रवारी मध्यरात्री ०१.४५ वाजेपासून ते ०४.३० वाजेपर्यंत शहराच्या केशव तिर्थ, गाळा नं. २, गोल्डन सिटी परिसरात करण्यात आली.
कारवाईदरम्यान शहर पोलिसांनी शुभम चंद्रकांत जाधव (२८, रा. इंदिरानगर), विशाल अशोक गायकवाड (२२, रा. जनतानगर), प्रथमेश अशोक पावडे (२२, रा. इंदिरानगर) आणि परवेझ दाऊद शेख (२६, रा. घुलेवाडी) या चौघा जणांना अटक केली आहे. हे आरोपी पोलिसांना प्लास्टिकच्या गोणीमध्ये सुमारे ३२ किलो ८४५ ग्रॅम वजनाचा काळपट व हिरवट रंगाचा सुका गांजा (कॅनाबीस वनस्पतीचे शेंडे) विक्री करण्याच्या उद्देशाने बाळगताना पोलिसांना मिळून आले.
या गंभीर गुन्ह्याप्रकरणी संगमनेर शहर पोलीस स्टेशनमध्ये पोलीस कॉन्स्टेबल विजय आण्णा खुळे यांच्या फिर्यादीवरून तत्काळ क्रमांक १०७३/२०२५ अन्वये गुन्हा दाखल करण्यात आला आहे. पकडलेल्या चारही आरोपींविरुद्ध अंमली औषधे द्रव्य मन प्रभावी पदार्थ अधिनियम १९८५ (NDPS Act) चे कलम ८(क), सह २२(ब) आणि २०(ब) प्रमाणे गुन्हा नोंदवण्यात आला आहे.
संगमनेरचे उपविभागीय पोलीस अधिकारी डॉ. कुणाल सोनवणे, शहर पोलीस ठाण्याचे पोलीस निरीक्षक समीर बारवकर आणि पोलीस उपनिरीक्षक श्रीकांत सावंत यांच्या नेतृत्वाखालील पथकाने ही कारवाई केली. आरोपींना अटक करण्यात आली असून त्यांना न्यायालयासमोर हजर केले जाणार आहे. पोलीस कस्टडी दरम्यान आरोपींकडे गांजा कुठून उपलब्ध झाला तो कोणाला दिला जाणार आहे याची माहिती मिळविली जाणार आहे. या आधारे पोलिसांना पुढील रॅकेट शोधणे सोयीस्कर बनणार आहे.
या रॅकेटच्या मुळापर्यंत पोहोचण्यासाठी पुढील तपास पोलीस उपनिरीक्षक श्रीकांत सावंत हे करत आहेत.
संगमनेर शहरात पोलिसांची मध्यरात्री धडक कारवाई: ८.२१ लाखांचा गांजा जप्त, चार आरोपींना अटक; सलग दुसऱ्या दिवशीही गांजा संदर्भात मोठी कारवाई!
या रॅकेटच्या मुळापर्यंत पोहोचण्यासाठी पुढील तपास पोलीस उपनिरीक्षक श्रीकांत सावंत हे करत आहेत.
