अहिल्यानगर | महाराष्ट्र संवाद न्यूज:
अहिल्यानगर जिल्ह्यात अवैध धंद्यांविरोधात पोलिसांनी कंबर कसली असून, स्थानिक गुन्हे शाखेने (LCB) चंदनाची तस्करी करणाऱ्या एका मोठ्या रॅकेटचा पर्दाफाश केला आहे. नाशिकहून श्रीरामपूरच्या दिशेने चंदनाची लाकडे घेऊन जाणाऱ्या एका पांढऱ्या रंगाच्या स्विफ्ट कारची पोलिसांनी सिनेस्टाईल सापळा रचून झडती घेतली. या धडाकेबाज कारवाईत ५ लाख ७० हजार रुपयांच्या मुद्देमालासह एका आरोपीला बेड्या ठोकण्यात आल्या आहेत.
जिल्ह्यात अवैध चंदनाची वाहतूक व विक्री करणाऱ्यांवर कडक कारवाई करण्याचे आदेश जिल्हा पोलीस अधीक्षक सोमनाथ घार्गे यांनी दिले होते. या आदेशान्वये स्थानिक गुन्हे शाखेचे पोलीस निरीक्षक किरणकुमार कबाडी यांनी विशेष पथक तयार करून तपास सुरू केला होता.
गुरुवारी (१८ डिसेंबर) एलसीबीचे पथक लोणी पोलीस ठाण्याच्या हद्दीत गस्त घालत असताना, त्यांना एका पांढऱ्या रंगाच्या स्विफ्ट कारमधून नाशिकहून चंदनाची लाकडे श्रीरामपूरकडे नेली जात असल्याची खात्रीशीर माहिती मिळाली होती. त्यामुळे या पथकाने संशयित वाहन पकडण्यासाठी तातडीने मोहिम हाती घेतली.
मिळालेल्या माहितीच्या आधारे पोलिसांनी तळेगाव ते लोणी रोडवरील डॉ. एपीजे अब्दुल कलाम सेंटरसमोर सापळा लावला. काही वेळातच संशयित कार येताना दिसली असता पोलिसांनी तिला इशारा करून थांबवले. कारची झडती घेतली असता पोलिसांना त्यामध्ये ६० हजार रुपये किमतीची ३० किलो चंदनाची लाकडे, ५ लाख रुपयांची मारुती सुझुकी स्विफ्ट कार आणि १० हजार रुपयांचा मोबाईल असा एकूण ५ लाख ७० हजार रुपयांचा मुद्देमाल मिळून आला. पोलिसांनी हा सर्व मुद्देमाल जागीच जप्त केला.
या प्रकरणी पोलिसांनी हनुमंता भिमा मोरे (वय ४५, रा. उंबरगांव, ता. श्रीरामपूर) याला ताब्यात घेतले आहे. त्याची सखोल चौकशी केली असता, ही चंदनाची लाकडे त्याने उत्तम नारायण पवार (रा. सिन्नर, जि. नाशिक) याच्याकडून विक्रीसाठी आणल्याचे कबूल केले. सध्या मुख्य सूत्रधार उत्तम पवार हा फरार असून पोलीस त्याचा कसून शोध घेत आहेत.
याप्रकरणी लोणी पोलीस ठाण्यात भारतीय न्याय संहिता (BNS) २०२३ चे कलम ३०३(२), ३(५) सह भारतीय वन कायदा आणि महाराष्ट्र वन अधिनियमानुसार गुन्हा दाखल करण्यात आला आहे. ही यशस्वी कारवाई पोलीस अधीक्षक सोमनाथ घार्गे यांच्या मार्गदर्शनाखाली स्थानिक गुन्हे शाखेचे (एलसीबी) पोलीस निरीक्षक किरणकुमार कबाडी आणि त्यांच्या पथकातील राहुल द्वारके, भीमराज खर्से, राहुल डोके, प्रमोद जाधव, सतिश भवर, सुनील मालणकर आणि चालक महादेव भांड यांनी केली आहे. पोलिसांच्या तपासातून पुढे काय समोर येते हे त्या काही दिवसात स्पष्ट होईल.
