संगमनेर पालिकेचा ‘महासंग्राम’! तीन जागांसाठी आज मतदान; सेवा समिती की महायुती? उद्याच्या निकालाकडे राज्याचे लक्ष

संगमनेर | अनंत पांगारकर

संगमनेर नगरपरिषदेच्या रखडलेल्या तीन जागांसाठी आज (शनिवारी) रणधुमाळी उडाली आहे. या तीन जागांसाठी आज सकाळीच शांततेत मतदान सुरू झाले असून सकाळी साडेनऊ पर्यंत ६.६१ टक्के मतदान झाले होते. तर नगराध्यक्षपदासह २७ जागांसाठी २ डिसेंबरला मतदान झाले आहे. उद्या रविवारी होणाऱ्या मतमोजणीनंतर संगमनेर शहराच्या स्थानिक राजकारणाची आगामी दिशा स्पष्ट होणार आहे.

विधानसभा निवडणुकीच्या निकालानंतर तालुक्यात होत असलेली ही पहिलीच मोठी निवडणूक असल्याने या निकालातून शहराचा ‘किंग’ कोण ठरणार? याची उत्सुकता शिगेला पोहोचली आहे. सुमारे ११,४२६ मतदार आज ९ उमेदवारांचे भवितव्य ईव्हीएम मशीनमध्ये बंद करणार असून, उद्या रविवारी (२१ डिसेंबर) होणाऱ्या मतमोजणीकडे सर्वांचे डोळे लागले आहेत.

या निवडणुकीत प्रामुख्याने संगमनेर सेवा समिती आणि महायुती यांच्यात प्रतिष्ठेची लढत होत आहे. महायुतीमध्ये फूट पडले असून अजित पवारांच्या राष्ट्रवादी काँग्रेसने स्वतंत्रपणे काही प्रभागांमध्ये निवडणूक लढविली आहे. आज होत असलेल्या निवडणुकीतही एका जागेवर राष्ट्रवादी काँग्रेसकडून महिला उमेदवार उभी आहे.

नाशिक पदवीधर मतदार संघाचे आमदार सत्यजित तांबे यांच्या नेतृत्वाखाली संगमनेर सेवा समितीने आपले सर्व उमेदवार ‘सिंह’ चिन्हावर रिंगणात उतरवले आहेत. तर आमदार अमोल खताळ यांच्या नेतृत्वाखाली महायुतीमध्ये शिवसेना (शिंदे गट) ‘धनुष्यबाण’, भारतीय जनता पक्ष ‘कमळ’ आणि काही प्रभागांमध्ये चिन्हावर न लढता अपक्ष म्हणून निवडणुकीला सामोरे जात आहे. महायुतीत फोटो पाडणाऱ्या राष्ट्रवादी काँग्रेसचा अजित पवार गट ‘घड्याळ’ चिन्हावर नशीब आजमावत आहे. याशिवाय यावेळी मोठ्या संख्येने काही अपक्ष उमेदवारांनीही रिंगणात उडी घेतल्याने निवडणुकीत मोठी रंगत निर्माण झाली आहे.

आज शनिवारी पार पडत असलेल्या निवडणुकीतील प्रभागांमधील लढतींचे स्वरूप खालीलप्रमाणे आहे:

प्रभाग १ ब: माजी नगराध्यक्ष दिलीप पुंड (सेवा समिती) विरुद्ध अभिजित अरुण पुंड (महायुती) यांच्यात थेट सामना रंगला आहे.

प्रभाग २ ब: येथे तिरंगी लढत होत असून अर्चना दिघे (सेवा समिती), इंदिरा नामन (महायुती) आणि सुवर्णा म्हस्के (राष्ट्रवादी-अजित पवार गट) यांच्यात चुरस आहे.

प्रभाग १५ ब: येथे सेवा समितीच्या नसीमबानो पठाण यांच्या विरोधात अपक्ष उमेदवार झुलेखा पठाण आणि दिलशाद शेख यांनी आव्हान उभे केले आहे.

आमदार खताळ यांनी निवडणुकीत थोरात-तांबे गटाला शह देण्यासाठी आपले उमेदवार मैदानात उतरवले आहे. मात्र संगमनेरकर कोणाच्या पाठीशी उभे राहतात हे रविवारी स्पष्ट होणार आहे. सध्याच्या स्थितीमध्ये माजी मंत्री बाळासाहेब थोरात-आमदार सत्यजित तांबे आणि आमदार अमोल खताळ यांच्यासाठी ही निवडणूक प्रतिष्ठेची ठरली आहे. या निवडणुकीचे आगामी दूरगामी परिणाम दिसणार आहे.

निवडणूक शांततेत पार पाडण्यासाठी निवडणूक निर्णय अधिकारी डॉ. अरुण उंडे, तहसीलदार धीरज मांजरे आणि मुख्याधिकारी दयानंद गोरे यांच्या मार्गदर्शनाखाली कडेकोट पोलीस बंदोबस्त तैनात करण्यात आला आहे.